Weg! Agterpaaie Karoo
Seisoen 2 VIA (*147) 20:00 Leefstyl
Toast Coetzer, mede-aanbieder van Weg! Agterpaaie Karoo, het in die Karoo (Cradock) grootgeword en het as kind ’n besonderse band met sy grootwordwêreld gesmee. “Elke dorpie in die Karoo is anders, op subtiele maniere wat ’n mens dikwels eers besef wanneer jy daar wegry,” sê Toast. Hy vertel meer van sy wedervaringe tydens sy reis saam met sy kollega Erns Grundling.
Watter Karoo-mense op jul reis was vir jou die fassinerendste?
Fox Ledeboer, ’n man wat stoksielalleen by die Gamkapoortdam woon (episode 2). Fox is ’n roeier, maar die dam is dolleeg. Die pad loop by Gamkapoortdam dood en byna niemand kom ooit hiernatoe nie, veral nie wanneer die dam leeg is nie. Daar gaan soms weke verby sonder dat Fox ’n mens sien. Hy sit gereeld op sy stoep en kyk vir sy skilpaaie. Wanneer die skilpaaie na hoërliggende grond beweeg, weet Fox: die groot reëns is op pad.
Watter Karoo-dorpie was vir jou die grootste verrassing?
Williston (episode 11), want dié dorpie het ’n deli en ’n mall. Maar nie die soort mall waaraan jy dink nie – gaan kyk self!
Hoekom is Erns die ideale reisgenoot?
Ons ken mekaar al sedert ons studentedae en hoef nie regtig met mekaar te praat om te weet wat die ander een dink of voel nie. Ek dink ons vul mekaar goed aan voor die kameras. Erns is gewoonlik die bok vir sports terwyl ek op die agtergrond staan en vir sy manewales lag.
Wanneer het jy die meeste vir Erns gelag?
Erns was vrekbang toe oom Leon Swanepoel, windpompdokter van Carnarvon (episode 10), die windpompraam onder hom begin skud het terwyl Erns halfpad na bo geklim het.