Chicago Fire
Seisoen 4 M-Net (*101) 19:30 Aksie
Die brandweerreeks Chicago Fire (2012nou) het gou gewild geword en daar is al drie splinterreekse wat goed vaar – SA kykers weet van Chicago PD (2014nou) en Chicago Med (2015-nou). En volgende maand gaan M-Net die vierde reeks in die franchise verwelkom: Chicago Justice (2017-nou). En al is Chicago nie juis die beroemdste VSA-stad nie, sorg TV vir wonderlike kykgenot.
“Daar is ’n verbasende groei in franchise-reekse,” sê die Chicago-franchisebaas Dick Wolf. “Ons reekse bring die kykergetalle in en ons is baie trots op wat ons bereik het. Kykers vorm ’n band met ons karakters en die situasies waarin hulle hul bevind.” En waar die vier reekse gaan oor die lewens van staatsamptenare soos brandbestryders, dokters, paramedici en staatsadvokaat-prokureurs, het hulle almal iets gemeen: ’n kroeg, Molly’s. Die uitvoerende vervaardiger Danielle Gelber voeg by: “Ons het probeer om die karakters se emosionele lewe en hul verhoudings in hul daaglikse werk te verweef. Hul werk kom eerste, maar hul lewe daarbuite het ’n uitwerking en dis wat die gehoor week ná week terugbring.”
Daar’s ’n driepuntplan wat gevolg word wanneer die uitvoerende vervaardigers nuwe reekse beplan:
1 Niks is verbode nie Mense in verhoudings wat opmaak, uitmaak, jaloesie en afpersing, niks is te dramaties in die karakters se persoonlike lewe nie.
2 Luister na die fans Die produksiespan het ’n toegewyde lid wat sosiale media dophou om uit te vind waarvan kykers hou en nie hou nie.
3 Beplan vooruit Nie net seisoene nie, maar ook splinterreekse. Dick Wolf onthul daar’s “al konkrete planne gereed vir ’n vyfde splinterreeks as Chicago Justice ook suksesvol is”. •