Die ABC van TV
Deurmekaar met al die TV-terme wat ons gebruik? Lees hier presies hoe tvplus tussen verskillende genres onderskei en wat ons woorde beteken sodat jy maklik jou kykgenot kan kies.
As jy ’n woord lees en frons oor die betekenis, moenie dink jy is uit die oude doos nie. Omdat TV so vinnig ontwikkel, moet ons span soms selfs aan mekaar terme verduidelik – soos hoe ons onderskei tussen leefstyl- en realiteitsprogramme. Lesers vra ons ook soms wat ons bedoel met woorde soos binge-kyk of VOD, dus het ons besluit om te verduidelik presies hoe ons programme klassifiseer sodat jy weet hoe en waar om te kyk om jou gunstelinge te vind.
Aksie: Enigiets wat met misdaad en die polisie te doen het, soos MacGyver (2016-nou) en Chicago PD (2014-nou). ’n Reeks soos The Blacklist (2013-nou) val ook in die kategorie. Soms sukkel ons self om tussen aksie en drama te onderskei, want baie aksieprogramme is ook baie dramaties, maar ons groepeer alle polisieprogramme onder aksie. Betaal-per-kyk: Dit word net gebruik in WWE (sien bl. 39). Amerikaanse kykers moet ’n program per foon of die internet bestel en met hul kredietkaart betaal, soos vir WrestleMania of SummerSlam, voor hulle dit kan kyk. Gelukkig vir Suid-Afrikaners het e.tv al die regte gekoop en kan ons die WWEprogramme gratis kyk. Binge-kyk: Wanneer jy drie of meer episodes van ’n spesifieke reeks agtereenvolgens kyk. Dit is iets wat ál gewilder word danksy video-op-aanvraag (sien langsaan). Drama: Dink aan iets met ’n ernstiger storielyn. Daaronder sal reekse tel soos Vikings (2013-nou), This Is Us (2016nou) en House Of Cards (2013-nou). Dramedie: tvplus probeer wegbly van die term, want dit kan verwarrend wees. Maar as jy tegnies wil raak, kan dit reekse insluit soos This Is Us, Orange Is The New Black (2013-nou) en Devious Maids (2013-2016), waar drama en komedie vervleg is. Fantasie: Hierdie genre is suiwer fantasie, sonder enige wetenskaplike elemente, en speel gewoonlik in ’n antieke wêreld af. Game Of Thrones (2011-nou) is ’n goeie voorbeeld.
Fokusbladsye: Dit is ons artikels oor reekse buiten die sepies, en kan gewoonlik net voor die TV-gidse gevind word.
Kantkassie: By ons TV- gidse (van bl. 42- 65) is daar, buiten op ’n Saterdag en Sondag, kassies in geel op die regterkantste blaaie. Ons noem dit kantkassies, en daar doen ons graag kort stories en onderhoude of gee lesers ’n voorsmakie van iets wat kom. Soms is dit bloot interessante feite oor ’n program of akteur om daardie bietjie ekstra waarde vir geld te bied.
Komedie: Dit is gewoonlik halfuur lange sitkoms soos The Big Bang Theory, (2007-nou) en American Housewife (2016-nou). Animasie vir volwassenes, soos The Simpsons (1989-nou), groepeer ons ook onder komedies.
Leefstyl: Hier is al jou kos-, reis- en geselsprogramme. Dit sluit bv. Glam Guru (2013-nou) en Geure Uit Die Vallei (2014-nou) in.
Realiteit: Wanneer daar ’n kompetisieelement is en jy ’n prys kan wen, word dit van leefstyl onderskei en ’n realiteitsprogram, soos Kokkedoor (2013 en 2014) en Kokkedoortjie (2017-nou). Dit sluit ook programme in wat mense met ’n kamera in hul alledaagse lewe volg, soos Die Bergs (2017-nou).
Sci-fi: Dis ook fantasie, maar met ’n tegnologiese strekking. Soos mense wat genetiese manipulasie ondergaan het, bv. Orphan Black (2013-nou). Omdat tegnologie betrokke is en dit in ’n moderne wêreld afspeel, val American Gods (2017-nou) ook onder sci-fi. Video-op-aanvraag (VOD is die Eng. afkorting): Dis internetdiensverskaffers soos Showmax (sien bl. 9) wat volledige reekse op een slag beskikbaar stel sodat jy lekker kan binge-kyk.
WIE’S WIE
Regisseur: Is op die stel en gee leiding aan die spelers en produksiespan. Uitvoerende vervaardiger: Is betrokke by die finansiering en aspekte wat help om die program gemaak te kry. Vervaardiger: Hou toesig oor die hele produksie, van die geldsake tot die rolverdeling en redigering. Publisiteitsbeampte: Skakel namens die program met die media.