Op ’n drafstap
Die speurders Jerry en Harry gee skop aan seisoen 3 van Bosch.
Om die kollega van ’n LA-speurder soos Harry Bosch (Titus Welliver) in die misdaad-aksiereeks Bosch (2014-nou) te wees, beteken jy moet stamina hê. Vra maar net sy speurmaat Jerry Edgar (Jamie Hector), wat weer moet uithaal om by te hou in seisoen 3. “Ons het saam met regte speurders op hul rondes gegaan om te sien hoe hulle te werk gaan,” verduidelik die 41-jarige Jamie. “Maar niks kon ons voorberei op die werklike verfilming en om met ’n swaar vuurwapen rond te hardloop nie!” Ons het telefonies met Jamie gesels om meer uit te vind oor seisoen 3 . . .
Watter voorbereiding het jy gedoen om ’n speurder te kan speel?
Die proses was terselfdertyd maklik en moeilik. Ek het by die LA-polisiedepartement geleer hoe om te skiet, te bestuur en misdadigers te vang. Dit was die maklike deel. Vir die ander dinge, die toneelspeel-aspek, het ek na TV-programme soos Law & Order (1990-2010) en True Detective (2014-nou) gekyk. Dit was waardevol om meer te leer oor speurders se werkwyse en emosies.
Wetstoepassing in Amerika het onlangs onder skoot gekom. Het jou persepsie van polisiemanne verander deur een te speel?
Hulle doen ’n baie gevaarlike werk en plaas hul lewe daagliks op die spel om die gemeenskap te help. Dis ’n groot risiko, en myns insiens behoort elke polisiebeampte te besin oor sy of haar morele optrede. Daardie optrede behoort vanuit ’n goeie plek te kom, want as dit nie is nie, word dinge polities.
Bosch gaan nie net oor polisiewerk nie – gaan ons die seisoen persoonlike drama sien?
Beslis – verwag vyandige situasies, verhoudingsprobleme, morele optrede wat bevraagteken word en heeltemal ander storielyne. Ek moet dit waarskynlik nie uitlap nie, maar daar’s ’n wonderlike cliffhanger!
Baie programme eindig tog so. Wat maak Bosch anders?
Die pas – ons is altyd aan die beweeg en het verweefde stories. As jy elke storie uitmekaarhaal, word soveel aandag gegee aan detail, die skryfwerk, die toneelspel. Vir my is dit wat die program so lewensgetrou en eerlik maak.