Gaan hy boet?
Die groot vraag is of die reeksmoordenaar in seisoen 3 van The Fall gaan oorleef.
Speursuperintendent Stella Gibson (Gillian Anderson, agent Dana Scully in die sci-fi-reeks The X-Files, 1993-nou) is vol bloed wanneer die Britse polisiereeks The Fall (2013-nou) terugkeer. Maar die meeste bloed is nie hare nie . . . “Sy het haar verdagte en dan volg die skietery [aan die einde van seisoen 2],” sê Gillian. “Sy het die reeksmoordenaar vasgetrek, maar hy kan deur haar vingers glip.” Tog het Paul Spector (Jamie Dornan, Christian Gray in die Fifty Shades-flieks, 2015-nou) nie die Ierse polisie twee seisoene lank besig gehou om nou deur ’n wilde skieter afgemaai te word nie . . .
HY MOET BLY!
“Stella skree op die dokters om hom te red,” verklap Gillian. “Sy wil hê Paul moet leef. Hy het daardie vroue vermoor en hy moet boet.” Nie dat Jamie
sy hemplose tyd op die operasietafel geniet het nie. Die 35-jarige Ier het hom al uitgespreek teen seksisme jeens mans in die vermaakbedryf, en sê deur op voorkoms te fokus, “doen afbreuk aan ’n storie en program. Dit bestaan vir mans, nes vir vroue, in die bedryf. Jy kan dit nie ontken nie.”
EK KOM WEER
Seisoen 3 is blykbaar nie die swanesang nie, en Gillian het al laat val sy sal terugkeer as daar ’n vierde seisoen is. “Ek is opgewonde om die rol weer oor ’n paar jaar te speel, om te sien wat in Stella se lewe aangaan,” sê die 48-jarige. “Ek is nog nie reg om koebaai te sê nie.”
REG EN WEG Bederfbrokkie!
Paul oorleef die skietery. Hy’s daar tot die seisoenfinaal (ep. 6, 25 Julie), maar dis die einde vir die karakter. “Dit was soos ’n veiligheidskombersie,” het Jamie gesê ná seisoen 3 in Oktober 2016 in die VSA uitgesaai is. Maar daar’s nie kwade gevoelens nie. “Dis te veel gevra dat die SpectorGibson-dinamika net aanhou en aanhou,” sê Jamie. “Maar ek gaan die program en Gillian baie mis.”