Van Lucia
In die uitgawe wou ek graag skryf oor hoe paartjies en selfs vriende mekaar kan kul deur saamkykreekse skelm alleen te kyk. Dit raak ’n ernstige probleem in my lewe! Maar net toe ek wou begin kla (en raad vra by mede-TV-slawe), beland daar ’n e-pos van kykNET in my inboks wat belangriker is as my eie probleme. In Julie skommel kykNET hul programrooster en dis nogal ’n groot nuwe winterbaadjie wat hulle aantrek. In die volgende uitgawe sal ons al die veranderings uiteensit, maar die grootstes (wat my sepietyd raak) is Getroud Met Rugby, wat van 10 Julie weekdae om 21:00 uitgesaai gaan word. Dalk nie ’n slegte skuif nie, want dit laat hulle toe om storielyne in te bring wat nie geskik is vir gesinskyktyd nie. Suidooster skuif dieselfde dag na 18:30. Gits, ek sien klaar hoe ek gaan wip tussen kanale tot ek self nie meer kop of storiestert kan uitmaak nie. Van my gunsteling-weekbederwe, Kwêla, Bravo! en Jou Show, gaan nou oor naweke te sien wees. Sterkte met die aanpassings! As dit help, ons sal dit ook gewoond moet raak!