Nee vir ’n drietal
Fana draai briek aan in sy verhouding met Nolwazi, want Mazwi is steeds in die prentjie.
Generations – The Legacy Weekdae SABC1 (*191) 20:00
’n Mens kan nie alleen tango nie en die prokureur Fana (Mnqobi Duma) dink hy’s die enigste een op die dansvloer met sy aan-af-meisie Nolwazi (Thando Thabethe). Hy besef eers op Woensdag 21 Junie iets skort wanneer Nolwazi weier om saam met hom vir verhoudingsterapie te gaan, en “hy voel verwerp”, sê Mnqobi. “Fana kan nie verstaan hoekom sy nie tyd wil afneem by die werk om aandag te gee aan hul kwynende romanse nie.”
’N VEILIGE PLEK
Die volgende week, op Maandag 26 Junie, wil Nolwazi tog dinge met Fana uitwerk. Sy voel nog iets vir haar getroude eksverloofde Mazwi (Musa Ngema), wat Fana se swaer is, maar weet “diep in haar hart” sy sal nooit eerste kom in Mazwi se lewe nie, verduidelik Mnqobi. “Sy is op ’n veilige plek by Fana.” Fana is lief vir haar en neem haar dadelik terug, maar Fana weet ook “Nolwazi is tans nie op ’n goeie plek nie. En hy neem homself deels daarvoor kwalik,” vertel Mnqobi.
Nolwazi is in Maart vanjaar ontvoer en lewend begrawe deur Thabiso (Matli Mohapeloa). Fana was jare gelede Thabiso se prokureur, maar kon Thabiso nie uit die tronk hou nie. Die ontvoering van Nolwazi was Thabiso se wraakplan, en Mnqobi voeg by: “Nolwazi het nog nie van die trauma herstel nie. Fana wil nou daar wees om haar te ondersteun.”
Maar Nolwazi se inmengerige bestie Getty (Andisiwe Dweba) is nie oortuig daarvan Nolwazi is oor Mazwi nie, en op Woensdag 28 Junie waarsku sy Fana oor sy meisie wat saam met haar eksverloofde werk. “Hoewel hy Nolwazi vertrou, kan Fana tog nie help om oor Getty se woorde na te dink nie, en op Donderdag 29 Junie besef hy Nolwazi wil eerder op kantoor wees as tuis saam met hom,” sê Mnqobi. “Sy jaloesie neem oor.”
BAKLEI VIR MY
Ná ’n openhartige gesprek los Fana Nolwazi op Maandag 3 Julie. “Hy wil hê sy moet vir hom baklei,” verduidelik Mnqobi. “Sy moet sy hart terugwen, nes hy haar probeer terugwen het.” En dit lyk of sy omgekeerde sielkunde dalk gewerk het, want die volgende dag, op Dinsdag 4 Julie, kry Fana ’n uitnodiging vir ’n date by die Three Tower Hotel.