Mamma mia!
Die aan-af-paar Gabriel en Nikiwe deel dalk nog iets.
Hul verhouding het meer hoogte- en laagtepunte gehad as ’n tuimeltreinrit, en Nikiwe (Linda Sokhulu) het selfs begin Junie landuit gevlug sodat sy kon wegkom van Gabriel (Aubrey Poo) se beheer vraat maniere. Maar terwyl sy op Maandag 19 Junie oorsee was, het Nikiwe uitgevind hoewel hulle op verskillende vastelande is, het Gabriel steeds ’n houvas op haar – sy verwag sy kind!
NARE OF BLYE NUUS
Nikiwe was siek van bekommernis, maar kon tot dusver daarvan probeer vergeet (dit help om geld te hê om te kan rondrits). Noudat sy terug is in die land, moet Nikiwe die werklikheid aanvaar, en sy vertel Gabriel die waarheid op Woensdag 21 Junie. Nikiwe probeer self nog vrede maak met die swangerskap, maar haar minnaar is heel ingenome, sê Aubrey. “Hy is desperaat om die verhouding met Nikiwe te laat uitwerk, en hy gryp na strooihalms. Hy het [die welgestelde sakevrou] Nikiwe in sy lewe nodig om sy sakedrome te bewaarheid, maar met al hul rusies was hy bang sy verlaat hom vir goed.” Aubrey voeg by Gabriel is baie bly oor die babanuus, want nou sal hy altyd ’n band met Nikiwe hê. “Sy sal altyd deel van sy lewe wees, en dis goed vir besigheid.” Maar terwyl Gabriel van oor tot oor glimlag, hoop en bid Nikiwe haar swangerskaptoets was verkeerd.
NUWE HOOP
Nikiwe vertel haar sakevennoot-bestie Kgothalo (Katlego Danke) op Donder- dag 22 Junie sy wil nie Gabriel se kind hê nie. “Sy wil wegkom van Gabriel met al sy foute en skelmstreke,” verduidelik Aubrey. “As sy die baba het, gaan Gabriel altyd deel van haar lewe wees, maar eintlik wil sy net van hom ontslae raak,” voeg Aubrey by.
Dit lyk of iemand na haar gebede luister, want Nikiwe doen nog ’n swangerskaptoets op Vrydag 23 Junie en dis negatief. “Sy is verlig en baie dankbaar sy kan Gabriel nou finaal uit haar lewe kry,” sê Aubrey.
PLAN B
Wat Nikiwe nie besef nie, is dat dié wending Gabriel tot die uiterste kan dryf – hy sal alles in sy vermoë doen om te keer dat sy hom los. “Hy word obsessief oor haar,” verklap Aubrey.
Gabriel bekruip Nikiwe en hou vanaf Maandag 26 Junie elke beweging van haar dop – hy kyk met wie sy praat, soos die sakeman Benjamin (Arno Marais). Gabriel se jaloesie neem oor op Woensdag 28 Junie en hy dink Nikiwe het ’n affair met Ben. Aubrey sê “Gabriel verloor stadigaan sy varkies. Hy maak homself wys Benjamin is besig om Nikiwe by hom te steel. Hy moet seker maak Benjamin – en enige ander struikelblok – is uit sy pad sodat hy sake met Nikiwe kan regstel, al is sy klaar met hom.”
Dit lyk of Gabriel ’n selfs donkerder, meer bose kant het as wat ons gedink het – en dis kommerwekkend!