TV-rol-proewe
Veertien aspirantakteurs doen toneel vir toneel om vir The Final Cut aanvaar te word.
Om ’n deurbraak te maak in die toneelbedryf is geen maklike taak nie. Maar daar is dalk ietwat van ’n kortpad – die 13 episode lange realiteitsreeks The Final Cut (2017-nou). “Dit het begin as ’n gewone talentsoektog-voorlegging,” sê Lurdes Maswanganye, Final Cut se kreatiewe vervaardiger. “Later het dit ’n talentsoektog vir ’n sepie- of dramarol geword.”
Daar was geen gebrek aan deelnemers vir die oudisiefase wat in Mei verfilm is nie. Meer as 3 000 aspirant-akteurs het opgetree voor die beoordelaars – Karin van der Laag (Maggie in Isidingo, 1998-nou, tot 2012), Mmabatho Montsho (Lumka Dhlomo in Generations, 1994-nou, van 2005 tot 2007) en die plaaslike fliekregisseur Thabang Moleya (in die 2016-drama Happiness Is A FourLetter Word). “Die beoordelaars moes 14 deelnemers vir die hoofprogram
kry,” sê Lurdes en verduidelik meer . . .
Waarna soek die beoordelaars? Veelsydigheid is belangrik. Die beoordelaars moet ook seker maak die akteurs kan by enige situasie aanpas. Hulle hoef nie professionele te wees nie, maar hulle moet ruwe talent toon wat gevorm kan word. Waaruit het die oudisiefase bestaan? Die kandidate moes ’n monoloog van hul keuse voorberei, ’n draaiboek binne 15 minute leer en ’n geïmproviseerde stuk doen. Hoe het die drie beoordelaars net 14 “suksesvolle” deelnemers gekies? Ek weet nie. Daar is soveel talent daarbuite, dis ongelooflik! Selfs nadat die 14 deelnemers gekies is, het die beoordelaars teruggegaan na dié wat nie ingekom het nie om met hulle te praat en raad te gee vir hul toekoms.
Waar word die reeks geskiet? In ’n huis in Johannesburg om vir kykers te wys hoe die interaksie onder die 14 akteurs daar is en hoe hulle onder druk vaar. Hulle sal werksessies hê, toneelspelklasse en uitdagings kry. En vir die prys, weet jy in watter reekse die twee wenners sal speel? Nee [lag]. Dit hang af van watter karakters hulle die beste pas – dit kan ’n sepie of ’n drama op SABC3 wees.