Kil moordenaar
Die 1940’s-reeksmoordenaar John Christie se ysingwekkende dade word bekyk in die dramareeks Rillington Place.
“Dit was ’n uitdaging om John Christie te speel. Ek het nog nooit so iets aangepak nie,” erken Tim Roth (Cal Lightman in die dramareeks Lie To Me, 2009-2011). En sy rol as die reeksmoordenaar in die drie episode lange dramareeks Rillington Place (2016) is nog meer ysingwekkend omdat dit regtig in die 1940’s in Londen gebeur het. “John het die publiek en die mense naaste aan hom mislei. Hy het ongestraf bly moor,” voeg Tim by. “Hy het sy mag [as ’n oorlogsveteraan] misbruik en is toegelaat om voort te gaan met sy dade. Die polisiewerk was slordig. Hulle het soveel misgekyk.”
“ARME” OORLOGSVETERAAN
Tim sê die moeilikste was om in die kop te kom van die “Rillington Strangler” [John se bynaam oor sy moordmetode – om mense te verwurg of te vergas]. “Hy was ’n psigopaat. Ek ken die feite – ek is in 1961 gebore en dit was onlangse geskiedenis. Tot op ’n punt kan jy die lae wegstroop, maar jy kry nie tot sy kern deurgedring nie.” Die regte John het in die Eerste Wêreldoorlog geveg, maar is in ’n gasaanval beseer. Hy het drie jaar stom deurgebring, en het beweer weens die harde ontploffings en trauma kan hy nie harder as in ’n fluisterstem praat nie – luister dus mooi wanneer Tim in die reeks praat!