Pippa en die bottel
Pippa word vir dronkbestuur gevang en beland in ’n sel.
Die gevaarligte flikker vir assistentmatrone Pippa Malherbe (Nadia Valvekens). Op Dinsdag 4 Julie moet Pippa ’n liefdadigheidsgeleentheid van ’n vriendin bywoon, maar wanneer sy dieselfde aand huiswaarts keer, word sy vir bestuur onder die invloed van alkohol gevang. “Om alles te kroon moet sy ’n bloedtoets by Binneland se kliniek laat doen en Naomi (Je-ani Swiegelaar) is aan diens,” sê Nadia. Wanneer die uitslag wys sy het meer as die toegelate hoeveelheid alkohol in haar bloed, beland sy in ’n polisiesel. “Pippa voel verneder. So iets gebeur mos nie met ’n ma van ’n baba en ’n assistentmatrone nie!”
BINNELAND-STEREO
Hoewel Naomi belowe sy sal nie ’n woord oor Pippa se dronkbestuurdebakel rep nie, versprei die skinderstorie vinnig. Voordat Pippa in die polisiesel toegesluit word, neem sy haar baba, Dian (Noah Geldenhuys), na die Ferreiras se huis sodat hulle na hom kan kyk. Maar toe kom die snip Karli (Pascal Pienaar) onverwags daar aan en kry snuf in die neus iets is nie pluis nie. Naomi is stomgeslaan wanneer Karli haar kort ná Pippa se arrestasie meedeel haar verloofde, Tertius (Reynardt Hugo), is al ’n rukkie bekommerd oor Pippa se drinkgewoontes.
KOMMER EN ERKENNING
Pippa moet die oggend ná haar nagmerrie-ondervinding by die Binnelandkliniek rekenskap gee en vir At Koster (Hans Strydom) sowel as Conrad (Hykie Berg) verduidelik hoekom sy die vorige aand in ’n sel geslaap het. Tertius konfronteer Pippa oor haar sogenaamde drankprobleem en Conrad dring daarop aan dat Pippa professionele hulp kry. “Natuurlik is Pippa in ontkenning. Sy het die afgelope tyd met moederskap gesukkel omdat Dian so aanmekaar gehuil het, en ’n glas wyn of twee saans het haar gehelp om haar daaglikse probleme te oorkom,” vertel Nadia. “Dit het ’n nare gewoonte geword en beteken nie sy is ’n alkoholis nie. Sy is ook glad nie ’n slegte ma nie,”
Op Donderdag 6 Julie kom sy tot besinning en bel haar pa, Dirk (Richard van der Westhuizen) en vertel hom alles. "Hy is gelukkig baie simpatiek.”
Pippa word nou met valkoë dopgehou om te sien of sy gaan briek aandraai en of sy professionele hulp gaan kry. Of gaan die eksieperfeksie Pippa steeds elke aand ’n glasie of twee geniet?