OppieStoep
Seisoen 2 kykNET (*144) 18:00 Leefstyl
Die bobaas-storievertellers Andries Vermeulen en Pietman Geldenhuys is terug met ’n splinternuwe seisoen van OppieStoep – altesaam 39 episodes vol lekker lag en musiek. “Ons hou by die beproefde resep van die eerste seisoen, maar het die net wyer as die Wes-Kaap en Namakwaland gegooi om nuwe storievertellers bekend te stel,” sê Andries. “Hulle kom van onder meer die Kalahari, Suid-Kaap, Karoo en Noordwes-omgewing,” voeg Pietman by. OppieStoep 2 is weer voor ’n gehoor in die wynkelder van die Klein Parys-wynlandgoed in die Paarl opgeneem.
Die nuwe storievertellers is met behulp van OppieStoep se Facebookblad asook aanbevelings van ander mense opgespoor. “Ek en Pietman tree dwarsoor die land op en hoor gereeld van storievertellers wat ons kan inspan. Ons het weer oudisies gehou om die potensiële gaste te keur en net die beste stories te kry,” sê Andries. Bekende persoonlikhede soos die akteur en klavierspeler Pedro Kruger, die Dowwe Dolla (alias Margit Meyer-Rödenbeck) en die storieverteller Arno van Zyl gaan die lagspiere met hul kwinkslae prikkel. Die buikspreker Jannie de Bruyn en sy pop Tommy Thomson kom ook kuier.
Anders as sy voorgangers, Spies en Plessié – Met Permissie (TV1, 1989-1996) en Maak ’n Las (SABC2, 1994-2003), sluit die ekstra vermaak nie boeremusiek in nie, maar oorspronklike akoestiese kontemporêre musiek, vertel Andries. Die kitaarspeler Schalk Joubert stel weer met elke episode ’n musikant voor, van die gebore Russiese akkordeonspeler Stanislav Angelov tot die klavierspeler Janine Neethling, wat saam met hom musiek maak. Pietman voeg by: “OppieStoep is net die regte medisyne om die naweek mee te begin.”