Slang in die gras
Lee-Ann vermoed onraad oor die skielike opkappingsplanne vir die Suidooster-sentrum.
Konflik tussen die Jacobs- en October-familie is niks nuuts nie, maar sedert die sakeman Ian October (Abduraghmaan Adams) begin Julie voorgestel het hulle knap die inkopiesentrum op, is die messe uit. Die Jacobse besit die meeste aandele in die sentrum en wil die opknapping deurdruk, maar iets is nie pluis nie en dis nie lank nie voor iemand in die rug gesteek word.
ONMIN WORD GESAAI
Lee-Ann Jacobs (Portia Joel), die sentrum se bestuurder, voel van die begin af ongemaklik oor die opknappingsprojek. “Haar sesde sintuig sê vir haar iets is nie reg nie,” sê Portia. “Omdat die opknapping Ian se idee was, is sy nog meer gekant daarteen want sy vertrou hom glad nie.”
Op Woensdag 5 Julie saai Lee-Ann onmin tussen die winkelhuurders AB (Cedwyn Joel) van Aalwyn-Apteek en Stefan (Gideon Lombard), mede-eienaar van die restaurant Oos-Wes. “Sy weet die opgradering sal ongewild wees by die huurders, want dit sal beteken al die winkels se huur word verhoog en dit kan die einde van kleiner besighede beteken,” sê Portia. Die nuus van die winkelhuurders se ongelukkigheid bereik Mrs J (Theresa Sedras), ’n stigterslid van die sentrum, se ore op Donderdag 6 Julie en sy twyfel of sy die kontrak moet teken. “Dis vir haar belangrik dat die huurders wat die sentrum al die jare ondersteun, deel van die nuwe sentrum sal wees. Hul lojaliteit beteken vir haar baie en sy wil nie hê iemand moet skade ly nie,” sê Theresa.
SKOKONTDEKKING
Op Woensdag 12 Julie kom Lee-Ann op iets af wat die hele projek kan pootjie. “Dit het iets te doen met SuidoosterEiendomme se trustgeld wat gebruik sal word vir die betaling van die opgraderings,” is al wat Portia daaroor wil sê. En dan word iemand skielik gearresteer op Maandag 17 Julie! Kykers sal moet wag en sien wie agter tralies beland, maar dit was selfs vir ons ’n skok!
TYDSVERANDERING
“Ons is baie opgewonde oor die tydgleufverskuiwing van Suidooster wat saam met die groot skedulewisseling van kykNET gekom het,” sê Wilmer Müller, publisiteitsbeampte van die sepie. “18:30 is vir ons ’n perfekte tyd op kykNET en kykNET & kie.”