Nuwe intrekkers
Die Stryders maak kennis met hul nuwe spanbestuurder en sy feeksvrou.
Dinge is aan die broei by die Strydersbestuursraad, veral ná die aanstelling van die nuwe spanbestuurder, Bart Smit (Pierre Breytenbach), op Maandag 3 Julie. Hy en sy vrou Kristien (Marlee van der Merwe) het duidelik ’n agenda en niks gaan hulle keer om te kry wat hulle wil hê nie – al beteken dit hulle moet vuil speel . . .
WINSGEDREWE MAN
“Bart is net om een rede by die Stryders aangestel, en dis om seker te maak die rugby-unie maak geld,” sê Pierre. “Hy is ’n geharde man wat nie nee vir ’n antwoord vat nie en hy jaag wins na.”
Bart is gefokus en begin op Vrydag 7 Julie sy plan in werking stel wanneer hy en die Stryders se hoofafrigter, Schalk (Johan Scholtz), in Potties is. Bart noem dis tyd om ’n nuwe speler aan te stel, wat beteken een van die huidige spelers gaan moontlik uitgeskop word.
“BEHULPSAME” VROU
Intussen laat Kristien nie op haar wag nie en kom nader aan die Stryders deur die rugbyspeler Simon (David Louw) se ambisieuse vrou, Renate (Christel van den Bergh), te teiken. Kristien help Renate op Maandag 10 Julie met haar verkiesingsveldtog om aangestel te word as haar woonbuurt se landgoedvoorsitter. “Vir Kristien is dit ’n gulde geleentheid om Renate te beïndruk en haar in te wurm by die Stryders-vrouekring en so inligting vir haar man oor die spelers te kry,” sê Marlee. “Kristien is Bart se tweede vrou en ’n bietjie van ’n feeks. Sy is lojaal teenoor Bart en sal enigiets doen om hom met sy agenda te help,” sê Marlee. Kristien het teen Vrydag 14 Julie ’n interessante voorstel vir Schalk wat die Stryders se beeld kan bevorder. Maar of dit tot almal se voordeel gaan wees, betwyfel ons sterk.
TYDGLEUF VERSKUIF
Vanaf Maandag 10 Julie skuif Getroud Met Rugby se uitsaaityd van 18:30 na 21:00 op weekdae. Soné Combrinck, uitvoerende vervaardiger van die sepie, sê die tydgleufverandering is “positief” en “ons beplan geen veranderings aan ons huidige styl en aanslag nie”.