Beweeg boontoe
Die hiernamaals kry ’n prettige kinkel danksy die dooie Eleanor in The Good Place.
’n Mens sou dink om te sterf was die grootste probleem vir Eleanor Shellstrop (Kristen Bell) in The Good Place (2016-nou), maar dit is nie. Sy het “lewend” wakker geword in ’n paradys genaamd The Good Place – dis waar ’n mens wil wees, want dis die perfekte gelukstaat. Die gras is groen, die voëls sing en almal kom oor die weg. Maar Eleanor is nie veronderstel om daar te wees nie! “Sy is vir ’n ander Eleanor aangesien,” lag Kristen. “’n Gawer Eleanor wat ’n beter lewe gelei het. Nou moet sy sorg sy word nie uitgevang nie.” Sy sal moet jok . . .
LEWENDE DOOIES
Michael (Ted Danson, DB Russell in die aksiereeks CSI, 2000-2015) is “die argitek” – hy’s die ou in beheer van die woonbuurt waarin Eleanor woon en dis sy werk om haar
te lei en haar hand te hou, maar dit gaan sy geduld beproef.
Chidi ( William Jackson Harper, Everett in 2016 se dramafliek Paterson) was ’n etiekproffie en help Eleanor om haar geheim weg te steek sodat sy daar bly – hulle is sielsgenote.
Janet (D’Arcy Carden, Gemma in die dramedie Broad City, 2014-nou) is The Good Place se lopende, pratende inligtingsbron. As Eleanor ’n vraag het, het Janet die antwoord.
Jianyu (Manny Jacinto, Wing Lei in die aksiereeks The Romeo Section, 2015nou) is ’n stil Boeddhistiese monnik in die hiernamaals ná hy ’n DJ in die regte lewe was. Die immergelukkige oudfilantroop Tahani (Britse radio-DJ Jameela Jail) het ’n liefde-haat-verhouding met Eleanor, maar sal sy haar beskerm?
ONSOET BEDERFIE
Die agt bevrorejogurtwinkels in The Good Place verkoop dit nie regtig nie. “Ek wens!” lag Kristen. Die akteurs eet eintlik kapokaartappels.