Supernatural
Seisoen 12 Vuzu AMP (*103) 21:30 Sci-fi Die demoonjagter-broers Sam en Dean Winchester (Jared Padalecki en Jensen Ackles) was letterlik hel toe en terug in die sci-fi-reeks Supernatural (2005-nou). Maar in seisoen 12 kom hulle voor hul grootste uitdaging te staan: hul ma, Mary (Samantha Smith), wat terug is uit die dood. “Die program het nog altyd oor familie gegaan,” sê die vervaardiger, Andrew Dabb, “veral vir Sam en Dean. Hulle het hul ma 30 jaar laas gesien, en met haar terugkeer kry die gesinsdinamika ’n skokkende kinkel.”
Fans het Mary nog net een of twee keer gesien, soos in die eerste episode toe sy in ’n demoon verander het en doodgebrand het. Sy is aan die seuns teruggegee in die laaste paar sekondes van seisoen 11 (2016) toe Amara (Emily Swallow), oftewel God se suster The Darkness, met haar broer versoen geraak het en Mary as ’n dankiesê vir Sam en Dean vrygelaat het. “Daar is gemengde gevoelens wanneer die drie herenig,” sê Jared. “Mary is ’n vreemdeling vir Sam en Dean en hulle is vreemdelinge vir haar.” Jared voeg by: “’n Sekere kwesbaarheid is betrokke. As iets met haar gebeur, sal die seuns moet help, en omgekeerd. Hulle moet haar ook op die hoogte bring van hul taak.”
Die broers jag Lucifer (Mark Pellegrino), wat van liggaam tot liggaam spring – in episode 8 (24 Augustus) beset hy die VSA-president en hy vind ’n maat om die seun van Satan te dra. Die demoonjagters The British Men Of Letters is ook terug ná ’n vinnige besoek in seisoen 11, en die reëlgebonde jagters “beskou die broers as onvoorspelbare elemente en hulle sal Sam en Dean wil keer”, sê Jensen.