Kos en kompetisie
Sjef Reuben Riffel help studentesjefs om hul droomwerk te kry.
Op jul merke, bestanddele gereed, kook! Dis die uitdaging wat 20 studentesjefs in die gesig staar in die splinternuwe realiteitsreeks PROEFessioneel (2017-nou), wat in Julie op gratis TV afskop. Met ondervinding as professionele sjef en op TV as MasterChef SA (2012-2015), is Reuben Riffel die aanbieder en mede-beoordelaar van die reeks. Hy gee ons proeseltjies om ons mond te laat water.
Wat kan kykers van PROEFessioneel verwag?
As gevolg van die vele koskompetisies en -reekse op TV is daar baie jongmense wat die bedryf wil betree. Ons wys hulle nou wat hulle het om potensiële werkgewers te bied. In elke episode neem twee studentesjefs deel aan ’n uitdaging waar hulle ’n mandjie vol verrassende bestanddele kry wat hulle in ’n beperkte tyd in ’n dis moet verander
en komplementeer met hul keuse van wyn. Ek en 'n gasbeoordelaar beoordeel die geregte en kyk of die wenstudent geskik is om te werk by die gasbeoordelaar se restaurant, gastehuis of wat dit ook al is wat die gas besit. Elke wenner gaan deur na die volgende episode om dit uit te spook vir die posisie van wensjef.
Watter groot prys is op die spel?
Daar is 10 episodes waarin die wenner van elke episode aan die einde gaan meeding om die groot prys van R150 000.
Vertel ons van die bekende sjefs wat saam met jou gaan beoordeel.
Ons is tans besig om die reeks te verfilm en alles is nog nie gefinaliseer nie, maar daar gaan sjefs wees soos Bertus Basson (bekend vir Ultimate Braai Master (2012-nou) en Goed Beter Bertus (Dinsdae op VIA om 18:00) en Chris Erasmus (sjef en eienaar van die Foliage-restaurant in Franschhoek) wat my gaan help.
Watter dis sukkel jy by tye om te bemeester?
Beslis dim sum- geregte (gestoomde deeg, gewoonlik gevul met groente of varkvleis).
Wat is jou gunstelingbederfkos?
Roomys, lamskerrie, bobotie en kerrievarknek.