Stadige herstel?
Magda moet kom help bak met Koekie wat buite aksie is.
Getroud Met Rugby Weekdae kykNET (*144) 21:00
As daar nou een karakter is wat ’n kansvatter is, is dit Koekie (Rina Nienaber). Dié madam het aan die begin van Julie gesondheidsprobleme ontwikkel en beland toe wraggies in die hospitaal met ’n hartkwaal. Op Woensdag 19 Julie word sy ontslaan met die mediese raad om dinge rustig te vat. Maar soos ons Koekie ken, neem sy die raad letterlik op en misbruik haar sussie, Magda (Elzabé Zietsman), wat met haar soetkoekiebesigheid moet kom help.
KOMMIN KONINGIN
Magda is nes Koekie lekker kommin en het ook in die squat (plakkerskamp), soos hulle daarna verwys, grootgeword en gebly. “Magda is squat royalty,” sê Elzabé oor haar karakter. “Die mense van die squat dink sy is soos Queen Elizabeth, want sy is getroud met ’n man wat die twee grootste pandjieswinkels in Roodepoort besit. Maar hulle weet nie haar man verneuk haar lekker nie,” verklap sy verder.
Magda is egter nou in Johannesburg om vir Koekie haar soetkoekies te bak wat sy daagliks aan Bibi (Stephanie Baartman) se salon-en-koffiewinkel verskaf. Sy doen dit uit die goedheid van haar hart, maar op Vrydag 21 Julie raak sy keelvol vir Koekie wat haarself soos ’n pasiënt gedra. “Koekie is op die herstelpad, maar dit beteken nie sy gaan dit ’n vinnige proses maak nie. Dus skroom sy nie om Magda ’n bietjie te misbruik en rond te jaag terwyl sy lekker op die bank rus nie,” sê Rina.
HULP WORD INGEROEP
Gefrustreerd en uitgeput gaan vra Magda op Maandag 24 Julie by Maryke (Marijke van der Westhuizen) hulp met die onredelike Koekie wat te gemaklik op die bank raak. “Maryke reken Koekie moet oefening doen om die bloedsvloei te help en Magda dink dis ’n bak idee,” sê Elzabé. Dis net jammer Koekie dink nie dis ’n goeie plan nie en gaan nie sommer maklik haar nuwe rusbanklewe verruil om ’n tannie te word wat rondstap nie. Jy gaan hare op jy tande nodig hê, Magda. Sterkte!