Die storie agter die storie
Herleef al die sensasionele Huisgenoot-stories wat die tonge laat klap het.
Suid-Afrika se gewildste gesinstydskrif Huisgenoot slaag al 'n eeu lank daarin om week ná week miljoene lesers oor opspraakwekkende lewensdramas in te lig. Dink byvoorbeeld aan die brutale moord op die 22-jarige Matiestudent Inge Lotz op 16 Maart 2005 (episode 2), of die moord op die bekende musikant Taliep Petersen op 16 Desember 2006. In die nuwe reeks Huisgenoot: Ware Lewensdramas word 13 dramatiese gebeurtenisse weer vanuit alle hoeke bekyk.
ONVERGEETLIKE STORIES
Yvonne Beyers, redakteur van Huisgenoot, erken dit het kop krap gekos om 13 stories te kies. “Daar's beslis nie 'n gebrek aan onvergeetlike stories in Huisgenoot se argief nie. Trouens, ons skryf die afgelope eeu in elke uitgawe oor sulke dramas,” vertel sy.
Die Huisgenoot- en VIA-span het saam met die vervaardiger Red Pepper stories geïdentifiseer. “Ons het André Brink, 'n oud-redaksielid en gesoute joernalis, genader om navorsing te doen en uit te vind watter rolspelers beskikbaar sal wees om deel te neem aan die verfilming.” André is bygestaan deur Caroline Hillary, Annemarie van Basten en Laura Wener van Red Pepper wat die navorsing betref, en die argiefmateriaal is hoofsaaklik van die SABC afkomstig.
NUWE ERVARING
Die TV-reeks gaan beslis 'n ander impak hê as stories op papier, vertel Yvonne. “TV is 'n baie visuele medium. In talle episodes kyk ons ook na die rolspelers soos die polisiebeamptes en joernaliste wat agter die skerms gewerk het. Ons kyk na die gebeure agter die gebeure en dit verskaf boeiende kykstof.”
Die bedoeling is nie om ou wonde oop te krap nie. “Die vervaardigers het sensitief te werk gegaan met die onderwerpe sowel as die rolspeler,” verduidelik sy. “Benewens al die drama gaan kykers ook 'n kykie kry van die toewyding en menslikheid waarmee die joernaliste hul stories aanpak.”
En die storie agter die storie kan dalk net so indrukwekkend wees . . .