Legendes Van Afrikaanse Musiek
Seisoen 1 kykNET (*144) 20:00 Leefstyl
Boet Pretorius (79), of Dimpel, soos baie mense hom ken, het diep spore in die Afrikaanse musiekbedryf getrap. Hy het onder die vaandel van sy platemaatskappy Decibel, wat hy in 1982 gestig het, talle kunstenaars soos Gé Korsten, Rina Hugo, Anneli van Rooyen, Carike Keuzenkamp, Sias Reinecke en Gert van Tonder se musiek vervaardig en van hulle huishoudelike name gemaak.
Hoe het jy in die musiekbedryf beland? As kind het ons hele gesin saam musiek gemaak. Ek het in 1955 op 17-jarige ouderdom vir die musikant Jurie Ferreira se orkes begin kitaar speel en daarna het ander boere-orkeste soos Nico Carstens, Duffy Ravenscroft en Hendrik Susan s’n gevolg. In die jare sestig het ek ná matriek elektronika gaan studeer. In 1973 het ek by die platemaatskappy Gallo as klankingenieur begin werk en kunstenaars se musiek opgeneem. Daarna het platemaatskappye soos Brigadiers gevolg. Watter Afrikaanse kunstenaars se prestasies
het jou die meeste verras? Die jong sanger Riaan Nienaber wat destyds 11 jaar was toe hy sy eerste album, 1 000 Soene (1991), opgeneem het. Ons het ’n kans gewaag dat hy volwasse liedjies sing, maar toe verkoop sy eerste album meer as 85 000 eksemplare. Sias Reinecke se liedjie Sproetjies was in 1978 ook die grootste treffer tot dusver in die Afrikaanse musiekbedryf en het meer as 300 000 eksemplare verkoop.
Wat doen jy deesdae? Ek is semi-afgetree en woon net buite Rust de Winter, waar ek saam met my vrou, Yvonne, my dogter Janine en haar man, Mark Knez, die Mangwa Valley Game Lodge help bestuur.