24 Generations
Generations – The Legacy
Weekdae SABC1 (*191) 20:00
AUGUSTUS
Mrekza wil die keer ’n sê in sy liefdeslewe hê, maar hy vryf sy beheersugtige meisie Lucy verkeerd op. Dokter Sphe diagnoseer haar dogter, Rorisang, verkeerd om die familie die skrik op die lyf te jaag, en die Diales probeer die naïewe Lesedi van die gekwelde tiener Mpho red. Die Moroka-broers Mazwi en Smanga vergeet van hul verskille om hul oom Tau uit die familiebesigheid te stem. Nandi wonder oor haar dogter Sphe se senuagtigheid wanneer sy van Rorisang se gesondheidsprobleme praat, en Lucy is woedend wanneer Lesedi uit die huis glip om Mpho te ontmoet. Tau probeer intussen sy vyand Jack se seun Fana manipuleer om saam met Tau in vennootskap te gaan teen Mazwi en Smanga.
SEPTEMBER
Lesedi reik uit na Mpho wanneer hy haar van sy probleme vertel noudat Zondiwe by is, en Sphe verloor beheer oor haar emosies wat haar man, Mazwi, betref. Mazwi is bekommerd oor Sphe se geestesgesondheid, maar sy stoot hom weg wanneer hy troos en steun bied. Tau vorm ’n alliansie met sy gewese swaer Gadaffi in nog ’n poging om Mazwi en Smanga te vernietig, en Jack het die kuberkraker Zach net waar hy hom wil hê. Zondiwe is moeg van die roekelose Mpho, en die Moroka-raadgewers is verstom oor Sphe se versoek om te skei– sy het breekpunt bereik met die ontroue Mazwi en sy wil skei, ongeag die koste en verleentheid.
OKTOBER
Sphe weier om met haar familie te praat en sy vra Mazwi om hul egskeidingsontmoeting uit te stel – sy beplan stilletjies ’n ontsnapping vir haar en Rorisang. Mpho haal weer sy ou streke uit en leer sy pel Brian sy [Mpho se] steeltruuks, en Namhla is ontsteld wanneer sy hoor Zach het vir haar gelieg en dat hy weer ’n misdadiger is. Wandile waag haar lewe met die geslagsveranderingsoperasie, en Namhla los vir Zach omdat hy vir haar gejok het. Zitha verdwyn ná ’n driftige vergadering met die JM Eco City-vennote, en Fana word kwaad wanneer sy pa, Jack, hom by sy twyfelagtige besigheid betrek. Intussen ontplof ’n bom by Siqalo-hof en daar word met die slegte Gadaffi na die hospitaal gejaag.
VERLEDE KEER
Lucy het Mrekza gesmeek om haar terug te vat, en Sphe het teen haar familie uitgevaar toe hulle haar moedervermoëns bevraagteken het.
2 – 4 AUGUSTUS
Mazwi is bekommerd wanneer baba Rorisang hospitaal toe geneem word vir ’n noodoperasie, en Lesedi is senuagtig om haar kêrel Mpho in haar vertroue te neem. Die Diales tref ’n halfkaal man in hul huis aan, en Sphe en haar dokters probeer Rorisang weer gesond kry. Nolwazi gesels met haar sielkundige, dr. Watson, oor haar gebroke verhoudings, en Smanga is bang sy “niggie” Rorisang gaan sterf voordat hy ’n band met haar kan vorm.
7 – 11 AUGUSTUS
Die nuuskierige Nandi is ontsteld wanneer haar dogter Sphe haar wegstoot, en Jack wil baie graag van Tau ontslae raak voordat sy besigheid verder skade ly. Mrekza sit sy voet dwars wanneer Lucy beheer van hul romanse probeer neem, en Sphe gebruik Rorisang se gesondheidsprobleme om haar ongelukkige huwelik met Mazwi te red. Die polisie klop aan die Morokas se deur met vrae vir Tau, en Smanga probeer nader aan Rorisang kom.
14 – 15 AUGUSTUS
Tshidi verbied Mpho om met Lesedi uit te gaan. Die broers Mazwi en Smanga ignoreer hul oom Tau in sy uur van nood, en Jack is vol vreugde wanneer dit klink of Tau se doppie geklink is.