Wapenstilstand
Ross Poldark galop terug vir ’n derde seisoen van dapperheid, waagmoed en kaal bolywe.
Die soldaat wat mynbaas geword het, Ross Poldark (Aidan Turner), is per boot op pad na Frankryk wanneer seisoen 3 van die periodedramareeks Poldark (2015-nou) begin. Hy speel weer ’n soldaat en is die keer op ’n reddingsvaart tydens die Franse Revolusie van 1794. “Ons het op ’n ongelooflike plek verfilm met ’n reusegrag en riviere en klein plekkies waar ons met ’n roer in die woud kon wegglip, wat lekker was,” vertel Aidan. “Ons het professionele geweeropleiding gekry, en die bajonette was eg!”
Maar pret met gewere eindig op die stel met trane, want die 34-jarige Ier het sy vinger gebreek toe dit in die pad gekom het van ’n ander akteur wat sy roer vir ’n toneel oorgehaal het. “Ek het net daarna geweet iets is verkeerd en vir die volgende 30 sekondes het dit soos jellie gevoel,” sê Aidan. En soos in die reeks gaan goed gemaakte planne een kant toe en die lewe slaan ’n ander rigting in . . .
MAN, VROU & MEER
Terug by die huis is daar ook hope aksie tussen Ross en sy vrou, Demelza (Eleanor Tomlinson). “Ons sien hoe Ross sy verhouding met Demelza herstel [sy het hom uitgeskop nadat sy van sy ontrouheid met Elizabeth in seisoen 2 uitgevind het],” verduidelik Aidan. Ons gaan ook Demelza se religieuse broers Sam (Tom York) en
Drake (Harry Richardson) ontmoet. “Ek dink nie Ross is juis bekoor deur die Metodiste-beweging nie. Ross sien hulle is goedgeaard, maar vir hom is hulle effens oninteressant . . . en hulle kan nie drink nie,” skerts Aidan.
ROSS TEEN GEORGE
Terwyl Ross se ander liefde,
Elizabeth (Heida Reed), die seisoen stilletjies sy kind gaan hê, begrawe Ross en haar man, George Warleggan (Jack Farthing) die strydbyl. “Hulle kan nie bekostig om mekaar ernstige skade aan te doen nie,” sê Aidan. “Ter wille van hul vroue en kinders moet hulle ’n ooreenkoms bereik.”