Eerlike, skreeusnaakse komedie
Carine Rous skitter in ernstige en komiese rolle.
Elke Skewe Pot Seisoen 1 Maandae kykNET (*144) 20:00
Die eerste ding wat ’n mens van Carine Rous (34) oplet, is haar aansteeklike, borrelende lag. In die komedie Elke Skewe Pot (2017nou), speel sy Anna, ’n 31-jarige kopieskrywer wat ’n totale ommekeer gemaak het. “Sy het tot siens gesê vir haar werk en prokureurkêrel van agt jaar en besluit sy wil oor begin,” sê Carine op haar kenmerkende nederige manier. “Ek glo baie kykers sal hulle met die verandering kan vereenselwig.”
WEES GELUKKIG
In ’n oomblik van helderheid het Anna ’n groot waarheid ontdek: Daar’s niks verkeerd daarmee om teen die samelewing se gedragreëls te gaan en jouself soms te verras nie – uiteindelik gaan dit daaroor om gelukkig te wees. “Sy was ongelukkig met haar ou lewe en al lyk haar nuwe lewe saam met die lawwe vroue van die aanlynafspraak-webtuiste Elke Skewe Pot nie so blink nie, beteken dit nie dit kan nie besonders uitdraai nie,” sê Carine.
OP DIE REGTE TYD
Die reeks het net op die regte tyd gekom nadat Carine en haar kollegas se kontrakte by die sepie High Rollers (2013-2016) einde Desember verlede jaar kortgeknip is toe die SABC die program gekanselleer het. “Dit was sleg,” sê Carine wat die rol vertolk het van die tawwe koekie Esme Cilliers, wat deel was van die Kings-casino se bestuurspan. “As akteur weet ’n mens die bedryf bied geen sekerheid nie en dinge kan maklik nie uitwerk soos jy gedink het nie. Dit was ’n groot teleurstelling en die manier waarop die SABC dit hanteer het, was onprofessioneel en onregverdig.” Gelukkig het Elke Skewe Pot op haar pad gekom. En dit was vir Carine wonderlik om weer haar komediebaadjie te kon aantrek.
PIENKVOET OP PAD?
Carine en haar fliekmakerman, Luke Rous van Rous House Produksies, is al nege jaar getroud en hulle is nou gereed om hul gesin groter te maak. “My hart is gereed om ’n mamma te word vir ’n seun of dogter.” Ons hoop ons sien haar sommer binnekort met ’n kleinding.