Death In Paradise
Seisoen 6 Maandae BBC Brit (*120) 20:00 Aksie
Die winde van verandering waai in seisoen 6 van die aksiereeks Death In Paradise (2011-nou) wanneer ’n paar persoonlike probleme wat opduik vir die polisiespan op die Karibiese eilandparadys Saint Marie, met ’n hoofkarakter wat midseisoen waai. “Dinge is ’n bietjie onderstebo die seisoen,” erken die uitvoerende vervaardiger, Tim Key, “maar daar is ook ’n hele spul raaiselagtige moorde wat opgelos moet word”.
Die onbeholpe speurder Humphrey Goodman (Kris Marshall, Nick Harper in die eerste vyf seisoene van My Family 2000-2011), neem in episode 6 (18 September) die moeilike besluit om na sy hart te luister en die eiland agter te laat, en Martha (Sally Bretton), die liefde van sy lewe, na Londen te volg. In ’n episode in twee dele (11 en 18 September) neem ’n ondersoek Humphrey van die sonnige strande van Saint Marie na ’n koue Londen, waar hy besluit om saam met Martha agter te bly. “Ons het al baie gesien van Humphrey wat misdade oplos, ook van sy besluiteloosheid, maar ons het Humphrey nog nie in enige verhouding of romantiese situasie gesien nie,” sê Kris. “Ek dink ons sal uitvind hy’s nogal sjarmant en ’n romantiese ou,” skerts hy. Kris het besluit om meer tyd saam met sy gesin deur te bring, want die reeks word ses maande per jaar en weg van die huis verfilm.
In Humphrey se plek is die akteur Ardal O’Hanlon, wat Father Dougal in die reeks Father Ted (1995-1998) gespeel het. Sy karakter, speurder Jack Mooney, verskyn op 11 September. “Mooney is vriendelik en hartlik,” sê Ardal, “en ek dink my karakter sal ’n bietjie prettigheid en aardigheid na die eiland bring.”