Blonde blits op die baan
Dorette Potgieter se eerste groot TV-rol was vol uitdagings.
Toe Dorette Potgieter (44) destyds die vroulike hoofrol in die TV-reeks Voete Van Goud (1998) kry, was sy allesbehalwe ’n groentjie in die bedryf. Sy het immers al as sesjarige in verhoogproduksies soos Gigi en The Sound Of Music (1997) opgetree, en buiten sing, dans en toneelspeel het sy as kind ballet gedoen. “Om die rol van ’n atleet te vertolk is wel ’n ander storie, want jy kan nie kul nie en moet fisiek alles uithaal en wys,” sê Dorette.
SELFDISSIPLINE
Dorette se atletiese voorkoms was ’n pluspunt toe sy die rol van die atleet Estelle Fouché kry. “Maar ek moes voor die verfilming hard oefen en dit het baie selfdissipline geverg,” onthou sy. “My vriend Tom Muller, my oefenmaat, het my baie met die voorbereiding gehelp en ons het etlike weke voor die verfilming soggens sesuur gaan draf.” Net soos met Anrich Herbst, wat die manlike hoofrol van Dewald Human vertolk, is ’n dubbelganger ingespan vir Dorette se ver skote. “Die nabyskote was ’n reuse-uitdaging, al moes ek net 100 meter hardloop. As jy dit sewe keer ná mekaar moet doen, is dit altesaam 700 meter!” lag sy. “Ek was behoorlik poegaai daarna.”
Anrich was wel ’n naelloper op skool, maar Dorette het net aan verspring deelgeneem. “En dan tel spoed nie so baie nie,” sê sy.
DAAI EERSTE SOEN
Dorette sal Voete Van Goud nie maklik vergeet nie, want dit was haar eerste soen op kamera – en dit van die eertydse hartebreker Gavin van den Berg (Ballade Vir ’n Enkeling, 1987-1993), wat Estelle se afrigter, Mike Williams, gespeel het. “Ek het vooraf vir Gavin gesê ek weet nie eintlik hoe om dit te doen nie, maar hy het my gerusgestel en gesê: “Gooi net jou kop agteroor, haal deur jou neus asem en beweeg jou lippe.”
Dorette het sy raad gevolg, maar die oomblik toe Gavin haar begin soen, snak sy na haar asem en snork kliphard! “Almal op stel het gelag en ons moes die toneel oorskiet.” Goue herinneringe!