PROEfessioneel
Seisoen 1 SABC2 (*192) 19:00 Realiteit
Toets, proe en sit voor. Dis wat die studentesjefs doen wat aan die realiteitsreeks PROEfessioneel (2017-nou) deelneem met sjef Reuben Riffel as hoofbeoordelaar en aanbieder. Die studente kry die kans om werkondervinding in toprestaurante op te doen, maar laat iemand ooit die kos op die grond val? Die vervaardiger, Ben Badenhorst van NBB Produksies, vertel meer.
1 Ben het self die konsep vir sy reeks uitgedink. Verfilming duur steeds voort en al 13 episodes word in Ben se ateljee in Stellenbosch geskiet.
2 Reuben is as aanbieder en beoordelaar gekies oor sy siening van die kosbedryf. “Reuben glo in terugploeg in die gemeenskap, en sy passie en kennis is onblusbaar,” sê Ben.
3 Dit duur ’n volle dag om een episode wat verfilm is tot die uitsaaityd van 24 minute te verkort.
4 Die sjefs se produkte en bestanddele word daagliks vars gekoop om enige vermorsing te voorkom.
5 Ben sê die grootste uitdaging is om almal, ook die regisseur, studente en gasbeoordelaars, se skedules te koördineer.
6 Daar is 10 gasbeoordelaars, onder andere Bertus (Goed Beter Bertus, Dinsdae VIA 18:00) in episode 6 (30 Aug.) en Chris Mare, hoofsjef van Reuben se Waterfront-restaurant One & Only in Kaapstad in episode 8, (13 Sep.).
7 Daar is lank gedink oor die regte naam vir die reeks, sê Ben: “Ons borg, Samsung, het uiteindelik op PROEfessioneel besluit.”
8 Iets snaaks en ongewoons wat gebeur het, was toe ’n student ’n aartappel in die mikrogolfoond vergeet en dit vlamgevat het. “Die hele stel was vol rook,” sê Ben.