Die twyfel skop in
Mariaan se plan om Lesedi te vernietig maak Justin skielik kriewelrig.
Weekdae SABC2 (*192) 18:00
Die prokureur Lesedi (KB Motsilanyane) gaan deur ’n moeilike tyd. Die sterk, vurige vrou is sedert Augustus nie haarself nie: Sy het ernstige probleme met haar sig en haar oë pyn kwaai. “Lesedi het steeds geen benul dat Mariaan [Deirdre Wolhuter] en Justin [Dann-Jaques Mouton] haar sig gesaboteer het deur met haar kontaklensvloeistof te peuter nie,” sê KB. Die skrander prokureur gaan nie gou die waarheid uitvind nie, maar ’n wending wat ons nie sien kom het nie, is dat Justin op Dinsdag 26 September gevoelens vir Lesedi begin ontwikkel.
OP DIE OORLOGSPAD
Daar is tans geen keer aan Mariaan nie. “Sy’s vasbeslote Lesedi moet boet omdat sy Mariaan se man, Chris [David Rees], valslik laat glo het hy’t ’n moord gepleeg [in Junie]. Mariaan gaan nie rus voordat Lesedi heeltemal vernietig is nie,” verklap Deirdre. En Mariaan beklemtoon dit vir haar handlanger, Justin, wanneer sy hom op Woensdag 13 September instruksies gee. “Mariaan wil hê Lesedi se sig moet verder verswak en dit moet haar loopbaan kelder,” voeg Deirdre by.
SKULDGEVOELENS KNAAG
Justin help bloot vir Mariaan omdat hy desperaat is. Mariaan het belowe sy sal betaal vir ’n prokureur vir Justin se verloofde, Amanda (Carina Nel), wat in die tronk is op aanklag van poging tot moord. In ruil daarvoor moet Justin Mariaan eers met haar wraakplan help. “Justin is in ’n hoek,” sê Dann-Jaques. “Soos Mariaan se wraakplan vorder en Lesedi ál meer met haar sig sukkel, begin die skuldgevoelens aan Justin knaag. Hy wonder of dit alles die moeite werd is,” voeg Dann-Jaques by.
Dan is daar ’n interessante verwikkeling wanneer Lesedi Justin op Dinsdag 19 September vra om haar assistent te word. “Sy’t haar vorige assistent in die pad gesteek [op 18 September] omdat dié haar verkeerde inligting gegee en sy toe ’n saak verloor het,” sê KB. “Lesedi weet Justin is werkloos, en omdat sy met haar sig sukkel vra sy hom om namens haar deur dokumentasie te werk vir toekomstige sake,” vertel KB.