Molesmaker
Ná ’n dronk Vegas-troue met Brady laat Theresa haar nuwe skoonpa in ’n koma beland!
Days Of Our Lives
Weekdae e.tv (*194) 17:30
Die wilde partytjiemeisie Theresa Donovan (Jen Lilley) is moeilikheid met ’n hoofletter M. En ons almal weet Brady Black (Eric Martsolf) kan net nie van moeilikheid wegbly nie. Hy sê vir Theresa op Donderdag 14 September om haar “partytjievoorrade” bymekaar te kry en die twee sit af na die berugte Las Vegas Strip op Maandag 18 September. Dit lyk of hulle ook by die Little Vegas Chapel gestop het, want wanneer Theresa Brady probeer regop help ná hy stomdronk by die dobbeltafels word, het hulle bypassende trouringe aan wat goed by hul ooreenstemmende pa-kwessies pas.
MONSTER-SKOONDOGTER
Theresa sleep Brady terug huis toe na die Kiriakis-herehuis op Woensdag 20 September, maar vind uit hy kan niks van hul troue onthou nie. Ná hy weer omkap maak Theresa ’n vinnige oproep na Brady se pa, John (Drake Hogestyn). Glad nie beïndruk met haar goedkoop ring of die huweliksertifikaat nie, sê John vir haar dit sal kinderspeletjies wees om die huwelik nietig te laat verklaar. Maar Theresa het ’n voorstel – gee haar $1 miljoen en sy gaan sonder ’n geraas weg . . . vir goed. As sy net meer aandag aan haar pa, Shane (Charles Shaughnessy), se spioenasiewerk gegee het. Sy ekskollega John neem hul gesprek op en belowe Theresa: “As Brady jou regtig leer ken, gaan hy jou haat vir die selfsugtige liegbek wat jy is.”
KOMA-KOMPLIKASIES
Wanneer hul argument later die dag fisiek word, moker Theresa John oor die kop met ’n vuuryster. Groot fout! Theresa het waarskynlik John se hele identiteit herlaai. John is ’n man wie se persoonlikheid van ’n enkele data- CD in die DiMera-kelder opgelaai is, en Jen lag: “John Black is ’n meesterspioen en ek weet nie hoe hy dit nie sien kom het nie. As ’n aktrise was dit vir my skreeusnaaks en ek was bly hulle het my daarmee vertrou. Ek het nog gesê: ‘Ek hoop nie ek slaan jou te hard nie!’”
’n Geskokte Theresa sit die vuuryster in die hand van haar bewustelose man Brady op Donderdag 21 September. En met John wat op Dinsdag 26 September in ’n koma is, wie kan sê sy jok oor die konfrontasie wat sy tussen die twee mans gesien het?