Hope nuwe pasellas
Kom reis, kuier, klets en kook saam in die nuwe seisoen van die gunstelingprogram Pasella.
Pasella Seisoen 26 Woensdae SABC2 (*192) 19:30 (begin 20 September)
Die gewilde SABC2-leefstylprogram Pasella is terug met ’n nuwe seisoen vol avonture en hoogtepunte. Die aanbieders neem kykers weer op ’n reis regoor die land – van Upington in die Noord-Kaap tot by die natuurskoon van die Blyderivier- canyon in Mpumalanga en die Krugerwildtuin in die noorde. In die program pak hulle uitdagende aktiwiteite saam met talle bekendes en sportsterre aan, maar stel ons ook bekend aan gewone mense wat ander se lewe positief verander en inspireer.
DIE SUPER-SEWE
Die aanbieders van die vo - rige seisoen wat al bekende gesigte in ons sitkamers is, is terug: Sean-Marco Vorster, HemelBesem, Melinda Bam, Paul Rothman, Vicky Davis en Dieter Voigt is weer op hul pos. Die akteur Viljé Maritz (Gys in Binnelanders, 2009-2012 en Werner in Swartwater, 2014 en 2017) is ’n aanwins en sluit as nuwe aanbieder by die span aan. (Lynelle Kenned en Heino Schmitt, wat ook aanbieders in die vorige seisoen was, het die span verlaat. Mishka Patel en Carmen Pretorius sal in seisoen 26 as gasaanbieders ingespan word.) Kyk uit vir ’n nuwe vroue-aanbieder (haar naam is nog ’n geheim) wat later by die span sal aansluit.
BESIGE AANBIEDER
Die 27-jarige Viljé, wat ons ook as Benjamin in die SABC3-dramareeks High Rollers (2013-2016) gesien het, het sy tande as aanbieder geslyp in SABC3 se leefstylreeks NAweek (2014). Hy is opgewonde oor sy nuwe uitdaging as Pasella-aanbieder. “Ek is ’n regte adrenalien-junkie en kan nie wag om aktiwiteite soos vryval aan te pak nie. Boonop gee Pasella my die geleentheid om bekende persoonlikhede sowel as mense wat ’n merkbare verskil in ander se lewe maak, beter te leer ken,” sê die Kapenaar en geesdriftige branderplankryer.
Viljé het pas saam met die Ontbytsake-aanbieder Eloise Cupido joga leer doen vir ’n Pasella-insetsel (episode nog nie geskeduleer), en vertel hy het dit terdeë geniet. Die akteur is deesdae ’n besige aanbieder: hy het in Julie by die kykNET-leefstylreeks Fiësta (2001-nou) se span aangesluit. “Fiësta fokus op feeste regoor die land, en Pasella plaas die kollig op individue en aktiwiteite. Gelukkig bots my Pasella- en Fiëstaskedule nie, want ons verfilm Pasella se insetsels in die week en Fiësta word oor naweke geskiet,” vertel Viljé.
Die aanbiedingstyl van die twee leefstylreekse verskil ietwat, voeg hy by. “Ek probeer my aanbiedingstyl vir Pasella meer in ’n geselstrant en ontspanne hou, want dan kry ek dikwels meer inligting uit die persoon met wie ek die onderhoud voer,” sê hy.
Ons kan nie wag om Viljé in aksie te sien nie!