’n Franse affêre
Ontmoet die Michelinster-sjef Jan-Hendrik van der Westhuizen.
Jan Seisoen 1 Dinsdae VIA (*147) 19:30 (begin 24 Oktober)
As kind het Jan-Hendrik van der Westhuizen daarvan gedroom om eendag sy eie restaurant te besit. Vandag spog die 35-jarige gebore Suid-Afrikaner met een in Nice, Frankryk, en het boonop in 2016 ’n gesogte Michelinster – ’n toekenning vir uitsonderlike kosgehalte en diens – gekry. Vandeesmaand kry hy nog ’n ster teen sy muur as aanbieder van sy TV-reeks Jan, waar hy sy passie vir kos met VIA-kykers deel terwyl hy deur Frankryk en Italië reis. Jan vertel meer:
Wat kan ons van jou kosprogram verwag?
’n Belewenis! Die avontuur begin by my restaurant JAN in Nice – die storie van hoe dit ontstaan het, die bloed, sweet en trane en alles wat dit geverg het om die restaurant uiteindelik in 2013 oop te maak.
Hoekom inspireer kos jou? Dit kom uit my kindertyd. In my ma en ouma se kombuise. Ek dink nie daar was ’n tyd toe kos maak nié vir my die mees aangrypende lewensbevestiging was nie. Dis ’n eindelose liefde.
Wat beteken die Michelinster vir jou? Dis
klaar ’n yslike prestasie om ’n restaurant te besit en om oop te bly. As jy nie iets vir mense bied wat ’n bietjie anders is en die perke oorskry nie, gaan jy dit eenvoudig nie maak in Frankryk nie. Om bo en behalwe al hierdie stres ’n Michelinster te kry, is baie spesiaal. Daar is seker nie ’n groter bevestiging dat al jou harde werk die moeite werd was nie as om te kan sê ja, ek het ’n Michelinster agter my naam. As jy mik vir die son, val jy dalk op die sterre.
Wie is jou rolmodel in die koswêreld? Ek kyk nie op na enigiemand bekends soos Gordon Ramsay nie. Die mense met wie ek grootgeword het, my vriende en familie, is my rolmodelle. Dis juis aan hulle wat ek hulde bring in die reeks. Hoe hulle my tot vandag toe inspireer.
Wat is jou kenmerkende dis? Dit verander heeltyd, maar mosbolletjies met geroosterde piesangbotter en ’n eetbare kers wat van kaiings gemaak is, is iets waarvoor mense terugkom.
Wat is jou grootste bederfkos? Peppermint Crisp-tert.
Jy is ook ’n fotograaf en skilder. Alles wat ek aanraak, sien ek as ’n foto of skildery. Die spasies, die lyne en hoe die lig val. Ek hou daarvan om met die atmosfeer te speel van ’n voorwerp of landskap wat ek wil afneem of skilder.