Drama: Erfsondes
’n Sagter Samantha kry ’n nuwe greep op haar lewe.
Seisoen 6 Dinsdae SABC2 (*192) 19:00
Catriona Andrew (43) het nog altyd haar stempel onmiskenbaar op ’n karakter afgedruk. Soos haar debuutrol as Jane Edwards in die sepie Egoli – Plek Van Goud (19922010) wat sy nege jaar lank (van 1995 tot 2004) vertolk het. Aanhangers was geskok toe sy Egoli destyds vrywillig verlaat het en haar karakter deur Corine du Toit oorgeneem is (nadat Jane van ’n perd afgeval het). Daarna het verskeie sterk rolle gevolg, soos Alix, ’n paaldanseres, spioen en kuberkraker in die aksiereeks Snitch (2004), en Nadien in die dramareeks The Lab (2013).
SABC2-kykers ken Catriona as die komplekse Samantha Spencer – ’n karakter wat sy ná vyf jaar in die dramareeks Erfsondes (2007-2012 en 2017) hervat. “Sam was in die verlede die slagoffer van die sondes van haar voorvaders, maar noudat sy self die ma is van ’n dogter, Lungi (Tiyana Williams), het sy sagter en mensliker geword,” vertel Catriona. “Sam het kalmeer en sy probeer om uit daardie bose siklus te ontsnap.”
PRODUK VAN VERLEDE
Waar haar karakter Jane in Egoli ook ’n rykmansdogter soos Sam was, meen Catriona Sam was moontlik eerder die slagoffer van haar opvoeding en omstandighede as bedorwenheid. “En dit het Sam daartoe gedryf om misdade te pleeg wat haar in die tronk laat beland het (seisoen 3), en het haar daarna aangespoor om wraak te neem op haar tweelingbroer, Chris (Emmanuel Castis), deur sy en Kate (Jana Kruger) se pasgebore dogtertjie, Katie, uit die kraamsaal te steel,” vertel Catriona.
In seisoen 6 kom haar karakter voor talle nuwe uitdagings te staan. “Sam en Vuyo (Bongo Mbutuma) woon in ’n moderne woonstel in Maboneng en hulle raak verstrengel in die lewe van die straatkinders in hul omgewing. Boonop moet hulle as veelrassige paartjie wys dat hul huwelik werk. Maar soos die spreekwoord lui, die liefde oorwin alles.”
Sam moet ook as sakevrou (medevennoot saam met Chris en Vuyo van die Spencers se maatskappy) haar staal wys, voeg Catriona by.
MA-WEES EN VERHUISING
Catriona het nes Sam die laaste paar jaar verskeie omwentelings en aanpassings in haar lewe gehad. Sy het self ma geword – sy en haar lewensmaat, die entrepreneur Nicolas Schwartz, het ’n sesjarige dogtertjie, Kenzi. Die gesin het drie jaar gelede van Johannesburg na Groenpunt, Kaapstad, verhuis. Sy verlang nog baie na die goue Egoli- dae, bieg Catriona. “Ek het kontak met ’n paar van die akteurs, soos Brümilda van Rensburg (Louwna), Christel Smith (Tarien), wat in New York
woon, en Ntathi Moshesh (Lerato).”
Herken mense haar op straat as Jane of Sam? “Nie een van die twee nie,” lag sy. “Hulle eien wel my stem en sê dan: ‘Jy is mos Catriona!’ Dis eintlik goed dat mense my nie net met een karakter identifiseer nie,” sê sy.