Expresso

Seisoen 7 SABC3 (*193) 06:30 Leefstyl

Om sy nuwe rol as pa met sy aanbiederswerk by die ontbytprogram Expresso (2010-nou) te kombineer, hou Graeme Richards op sy tone. Die 39-jarige skerts hy raak nog gewoond daaraan om sy danskampioen-lewensmaat, Lindsey Muckle, met hul sewe maande oue seuntjie, Jack, te deel. “Nes ek is Jack ’n bondeltjie energie, en hy hou ons heeltyd aan die gang. Hy het my baie oor myself geleer,” vertel Graeme, wat in 2012 by Expresso aangesluit het ná hy sportanker by die e.tv-program Sunrise (2008-nou) was. Jy het dus ontbytprogramme geruil? [Lag.] My plan was om my volle aandag aan toneelspeel te wy toe ek by Sunrise weg is. Ek het van Joburg Kaapstad toe getrek en ’n paar weke later het ’n vriend my van die aanbiederspos by Expresso vertel. Nes met Sunrise het ek as sportanker begin, maar ek doen nou verslag oor leefstyl, glansmense en ander nuus – dis ’n pretkant van die vermaakwêreld wat ek nooit gedink het ek sou dek nie. Hoe het jou aanbiedersvaardighede by Expresso verander? Ons leef in ’n wêreld waar die nuus elke sekonde verander. Die program is regstreeks, ons gooi alles bymekaar en hou die bal aan die rol. My vaardighede as onderhoudvoerder het baie verbeter. [Lag.] Expresso is ’ n ontbytprogram met ’ n sterk celeb- en vermaakelement . . . Ons het meer as 2 miljoen mense wat elke oggend kyk. Dis groot en dis iets waarop ek trots is. Ons vorm ’n band met ons kykers, en op hul beurt het hulle ons deel van hul daaglikse roetine gemaak. Watter gaste het jou tot dusver beïndruk?

Ek het die kans gekry om saam met emeritus-aartsbiskop Desmond Tutu en my ma, Sue Hopkins, tee te drink. Dit was spesiaal om die twee passievolste mense wat ek ken, bymekaar te kry.