Op die herstelpad
Tim word stadig maar seker gesond ná sy kopbesering.
Tim (Marco Spaumer) se lewe is sedert einde September stormagtig. Die jong argitek het ’n erge kopbesering opgedoen wat daartoe gelei het dat hy sy vermoë om te teken, sy werk en sy meisie, Danni ( Vashti Prins), verloor het. Maar daar is ’n silwer randjie, want vanaf Woensdag 22 November is Tim uiteindelik op die herstelpad.
KUNSTERAPIE
Daar is beslis ’n deurbraak in Tim, wat skaars ’n pen kon vashou, se toestand. “As deel van sy herstelproses het hy ingestem om vir terapiesessies te gaan en het begin skilder,” deel Marco. Sy rou en indrukwekkende kuns het sy vriende en familie beïndruk. En op Woensdag 22 November moedig sy pel, die Oos-wes-restaurantkelner Justin (Eden Classens) hom aan om sy skilderye te verkoop. Maar Tim is nie oortuig nie. “Sy skilderye is vir hom erg persoonlik. Daarin stort hy al sy emosie en frustrasie. Dit gaan nie vir hom oor geldmaak nie. Dis ’n manier om homself weer te vind,” sê Marco.
SKILDERYSMOUS
Danni, met wie Tim intussen versoen geraak het, is op Maandag 27 November in twee geskeur. “Sy tob oor die kans wat sy die vorige week gewaag het om foto’s van Tim se skilderye aan die skatryk sakevrou Bridgette (Denise Newman) te wys. Bridgette is gaande oor die kuns, want sy versamel kuns, maar het geen idee dis Tim wat dit geverf het nie,” sê Vashti. Op Woensdag 29 November maak Bridgette ’n aanbod op Tim se kuns wat Danni ontkant vang. Nou moet sy dink hoe sy haar skilderysmousery aan Tim gaan verduidelik. Sterkte, Danni!