Op soek na ’n sondaar
Katlego word geskors omdat hy glo ’n vraestel gesteel het.
“Die Polokwane-kookskool bied studente die geleentheid om die wêreld te kan pak, maar sy resep vir sukses is 'n ramp,” sê Patrick Seleka, wat die rol van die studentesjef Katlego speel. Alle klasse is op Vrydag 17 November gestaak toe sjef Marlene (Camilla Waldman) ontdek het daar is 'n vraestel soek – en die naïewe Kat is steeds in die middel van die drama. Hy is reeds op sjef Marlene se swartlys omdat hy met 'n medestudent,
Candice (Liza van Deventer), uitgaan, maar op Woensdag 22 November het hy 'n gevoel iemand het vir hom 'n strik gestel. “Kat werk hart en siel aan alles. Hy soek nie moeilikheid nie, maar moeilikheid is altyd op sy spoor,” sê Patrick.
DUBBELE DRAMA
Op Donderdag 23 November word die studente ondervra en “hulle is gefrustreer”, sê Patrick. “Hulle is 'n hegte 'familie' en wil dié gemors opgeruim hê sodat hulle vir die eindeksamen kan voorberei.” Patrick voeg by dit is veral moeilik vir sy karakter, want Kat probeer sy skoolwerk en persoonlike probleme tuis balanseer. “Kat se familie verwag net die beste van hom en besef nie dat dit tot die druk op sy studies bydra nie. En dié heksejag help nie veel nie.”
WEDLOOP TEEN TYD
Sjef Marlene ontdek 'n dossier met die geskiedenis van Kat se oortredinge op Maandag 27 November, wat insluit sy inhegtenisneming vir kriedietkaartbedrog in November 2016. “Maar hy is skuldig bevind omdat hy met die oortreders geassosieer is,” sê Patrick. “Nimrod en Fanie (Buhle Maseko en Gift Mokhampanyane) het agter die bedrog gesit. Kat het nie die bankkaarte gesteel nie en hy het ook nie 'n vraestel gesteel nie,” sê Patrick. Op Donderdag 30 November word Kat geskors en terwyl hy verbied is om by die kookskool te kom, gaan soek Candice en sy vriendin Mapitsi (Mogau Motlhatswi) op Dinsdag 5 Desember na leidrade wie vir hom 'n lokval stel. “Al wat Kat kan doen, is studeer,” sê Patrick. “Hy wil voorbereid wees vir die eksamen wanneer hulle hom vryspreek.”