Komedie: Hotel se Beer Adriaanse
Die veelsydige Beer Adriaanse woeker met sy talente.
Kykers lag elke Maandagaand lekker vir die onbeholpe hoteleienaar Thomas van As (Beer Adriaanse) in die komedie Hotel (kykNET 2016nou). Maar toneelspeel is net een van Beer se talle talente. Beer is ook ’n knap draaiboekskrywer, musikant en regisseur. Hy het einde Augustus ook as mentor by kykNET se Silwerskermfees vir jong rolprentmakers opgetree. “Ek sal graag in die toekoms nog – solank ek kan – wil skryf, toneelspeel en regie doen. As ek al drie in een jaar kan doen, des te beter, want die een voed die ander en rond my net meer af as fliekmaker,” sê hy. “Skryf, regie en toneelspeel is verskillende prosesse met unieke uitdagings,” voeg hy by. “Maar hierdie verskillende prosesse hou my goed op my tone.”
Watter soort flieks kyk jy graag? Ek kyk nie superheldflieks of reekse wat nie ’n einde in sig het nie, soos Suits (2011nou) of Grey’s Anatomy (2005-nou). Ek probeer voorspelbare rolprente vermy en ongelukkig val die meeste romantiese komedies in daardie kategorie. Behalwe rolprente soos Four Weddings And A Funeral (1994). Ek dink die Britte slaag soms daarin om unieke romantiese komedies te maak.
En TV-reekse? Die TV-reekse wat ek onlangs die meeste geniet het, is Fargo (2014-nou), Broad City (2014-nou) en Master Of None (2015 en 2017) was geniaal. Ek is ’n reuse-aanhanger van Girls (2012-2017) en Silicon Valley (2014nou) is ook skreeusnaaks. Ek het nie self ’n TV-stel nie en kyk dus baie flieks en reekse op Netflix, Showmax en DVD. Op die plaaslike front sien ek baie uit om binnekort Die Boekklub 2 (2017) en Waterfront (2017) te kyk. Is jy ’n groot aanhanger van realiteitsreekse en sepies? Nee. Die werklikheid is oorgenoeg realiteit vir my en sepies spreek ongelukkig nie tot my nie. Ek het persoonlik nie ’n probleem met sepies of realiteitsreekse nie en ek is seker albei genres bied goeie ontvlugting vir talle kykers.