Realiteit: My Vreemde Vriende
DuPreez Strauss ontmoet van sy vreemde Facebook-vriende.
Baie mense het Facebook-vriende wat hulle nog nooit in hul lewe ontmoet het nie – wat nog te sê ken? Die musikant en komponis DuPreez Strauss, wat onder meer die musiek vir die realiteitsreeks Spieëlbeeld op kykNET & kie geskryf het, spog met nie minder nie as 5 000 Facebook-vriende. Hy het op ’n dag besluit om 13 van sy Facebook-vriende te kies en hulle persoonlik te ontmoet, en die resultaat was propvol verrassings, vertel DuPreez.
HORISONNE VERBREED
DuPreez, ’n boorling van Bloemfontein wat al op vier kontinente (Afrika, Europa, Amerika en Asië) gewoon het, het ’n allemintige CV. Hy was onder meer al produksie bestuurder, TV- vervaardiger, komponis, dirigente n musiek regisseur .“Ek het van kleinsaf besluite k wil nie net in Bloemfontein bly nie, maar my horisonne verbreed. Ek hou daarvan om ander mense se kulture en ander subkulture te leer ken,” vertel hy.
DuPreez, wat aanbieder en vervaardiger van die realiteitsreeks SugarRushed (TopTv, 2012-2013) was, vertel My Vreemde Vriende is allermins ’n reisprogram, al verbreed hy sy horisonne. “Ek het 13 Facebook-vriende gekies wat heeltemal in ’n ander wêreld as ek leef, en dan leer ek hul wêrelde vanuit my eie hoek beter ken. Dit is amper soos ’n sosiale eksperiment. Ek wou uitvind of die mense wat ek gekies het, se lewe hoegenaamd ooreenstem met die lewe wat hulle op hul Facebook-bladsye uitbeeld. Ek wou ook uitvind hoekom mense aanlyn vriende met totale vreemdelinge word,” vertel DuPreez.