Nuwe aanbieders, dieselfde glans!
Twaalf celeb-sterre sit hul beste voetjies voor wanneer hulle hul danspassies uitvoer.
Dancing With The Stars SA Seisoen 1 Sondae M-Net (*101) 17:00 (begin 4 Februarie)
Om die dansvloer te betree is oorweldigend genoeg, so stel jou voor die hele land hou elke tree van jou dop. Dit is die werklikheid vir 12 onopgeleide plaaslike celebs wat hul dansskoene in die realiteitsreeks Dancing With The Stars SA (2018-nou) “inwy”. En so te kan dans voer hulle hul passies saam met ’n professioneel opgeleide danser uit. Soos met die dansers het die vervaardigers verkies om uit die vermaakwêreld te meng en pas, sê die vervaardiger Kee-Leen Irvine. “Wanneer ons die celebs kies, kyk ons na flieks, TV, sport, musiek, radio en enigiets tussenin. Gelukkig het almal wat ons genader het, ingestem en kon hulle die tyd inruim wat vereis word vir repetisies en die regstreekse verfilming.”
STAP VIR STAP
Soos met die gewilde SABC2- en SABC3-realiteitsreeks Strictly Come Dancing (2006-2014) sal daar repetisiebeeldmateriaal van agter die skerms wees asook die spoggerigheid, glans en uitrustings versier met blinkertjies van die regstreekse optredes. “Strictly is die oorspronklike titel en formaat,” verduidelik Kee-Leen, wat ook seisoene 1- 8 van Strictly Come Dancing SA vervaardig het. “Dit is deur die BBC geskep en is wêreldwyd verkoop onder die handelsmerk Dancing With The Stars.” Sy voeg by: “Die reeks was suksesvol, want dit volg ’n basiese wenformule, tesame met gedurige vernuwing in die produksie, soos met beligting, op die verhoog en ander elemente.”
NEEM DIE VOORTOU
Die vervaardigers het ook spesifieke idees gehad oor die aanbieders: Chris Jaftha, wat die leefstylreeks Top Billing (1996-nou) sedert 2013 aanbied, en die radio- en-TV-persoonlikheid Tracey Lange, wat die kykNET-leefstylreeks Bravo! aanbied sedert dit in 2012 begin het. “Chris het ’n loopbaan van meer as 20 jaar in die teaterwêreld – hy sing en dans en sy werk in die TV- en fliekbedryf maak hom nommerpas,” sê Kee-Leen. “Tracey is ’n ervare aanbieder en op die koop toe pragtig. Toe hulle saam voor die kamera verskyn, was dit duidelik hulle pas goed bymekaar.”
STEMME EN BEOORDELAARS
Die stemproses is redelik basies en is soos die meeste ander realiteitsreekse, verduidelik Kee-Leen. “Kykers stem elke week regstreeks tydens die vertonings via SMS. Die punte word 50/50 verdeel tussen die beoordelaars en die kykers, maar in die finaal is dit net die kykers wat bepaal wie die wenpaartjie is.” Drie pare sal in die laaste episode in April teen mekaar te staan kom.
En wat sal so ’n dansreeks wees sonder regstreekse musiek? Die dansroetines sal ondersteun word deur ’n regstreekse band met sangers op die agtergrond onder die musikale leiding van James Bassingthwaighte. Elk van die 13 episodes se dansstyle sal gekies word deur die hoofchoreograaf, Jason
Gilkison, in oorleg met Kee-Leen. Jy kan verwag om alles te sien, van die wals en salsa tot die tango en paso doble – en daar sal een of twee tuimels wees, waarsku Kee-Leen. “Dis nie maklik nie. Die celebs het ’n kontrak vir ’n ernstige uitdaging aangegaan!”
Die celebs en hul professionele dansmaat sal ure lank oefen voordat hulle die dansbaan aandurf vir hul eerste uitvoering – tot 12 uur per week terwyl hulle hul draaie en swaaie in die dansateljee doen! Dit gaan toeneem soos die weke verbygaan, want die beoordelaars gaan elke beweging met arendsoë dophou, en op die uitkyk wees na die geringste foutjie. En die deelnemers sal nie kan bluf nie, want die beoordelaars kom uit die dansbedryf en weet watter punt ’n paartjie verdien.
Die res van die paneel word nog geheim gehou, maar as Jason se kwalifikasies ’n aanduiding is, gaan baie vereis word om te beïndruk. Die Australiese choreograaf is ’n baldanskampioen en is sedert 2004 kreatiewe direkteur by Strictly Come Dancing UK (2004-nou).