Sjef Chris verklap van sy kosgeheime
Die sjarmante sjef Chris Smit deel sy passie en kosgeheime.
Of dit ’n wortelkaaskoek of gemarineerde biefstukribbetjie is, daar’s min geregte en gebak wat die bobaas-sjef Chris Smit nie kan bemeester nie. Waar sommige uithalerkokke hul kosgeheime dig bewaar, is Chris allesbehalwe suinig om syne te deel – en dis altyd lekker om iets nuuts by die kosfoendie te leer. In die tweede seisoen van Geure Uit Die Vallei neem Chris kykers weer op ’n reis deur die Franschhoek-vallei in die Wes-Kaap, die bron van sy inspirasie. Daarna wys hy hoe om smullekker disse en gebak aanmekaar te slaan wat selfs groentjies kan baasraak.
INSPIRASIE IS ORAL
Chris, wat in Phalaborwa in Limpopo grootgeword het, woon die afgelope tien jaar in Franschhoek en wou met die leefstylreeks sy skilderagtige tuiste aan die res van Suid-Afrika bekendstel. “Die Franschhoek-vallei bied iets besonders en roep jou altyd terug,” sê hy.
Sy inspirasie spruit nie net uit die goudbruin wingerde, blou berge of lowergroen weivelde nie. “Ek vind elke dag inspirasie oral om my. Dit kan die geur van ontbyt wees wanneer ek soggens verby die gastehuise stap, of dalk ’n smaaklike gereg wat ek by vriende geëet het.”
Maar al is jy hoe bedrewe in die kombuis, is dit nie ’n maklike taak om voor die kameras te kook nie. “Die bakwerk is seker die moeilikste. As jy brood wil bak en die brooddeeg te lank laat rys, val dit plat. Pasteideeg val weer uitmekaar as dit te warm is. Wanneer sulke flaters wel op kamera gebeur, is dit belangrik om kykers te wys hoe om die situasie te red om steeds goeie resultate te kry.”
ELTON JOHN EN MADIBA
Dis nie net moderne resepte wat Chris agter die kospotte laat inspring nie. “Ek hou deesdae daarvan om met tradisionele familieresepte te werk. Dit bring soveel goeie herinneringe uit my kinderdae terug. Ek verander die ou resepte hier en daar en kry my ma, Elsie Smit, se mening oor die aanpassings,” vertel Chris.
Sy liefde vir kos maak het juis in sy ouma se kombuis begin. “My ouma Tiekie Zwarts het tydens skoolvakansies in die Krugerwildtuin vir my resepte gegee om uit te probeer. My hele familie is lief vir kook.”
Chris het sowat agttien jaar gelede voltyds begin kook en was tot agt jaar gelede die uitvoerende sjef van die landelike herehuis La Residence in Franschhoek, waar hy al vir bekendes soos die Britse sanger sir
Elton John gekook het (in 2004). Staatshoofde soos wyle oudpres. Nelson Mandela het ook by sy tafel aangesit. “Ek het jare gelede, ek kan nie onthou presies wanneer nie, in Pretoria by ’n geleentheid gekook waar Madiba ’n gas was en het ’n eenvoudige dis, hoenderpotjie met rys en slaai, voorgesit. Dit was ’n groot voorreg vir my.”
DIE WENRESEP
Chris, wat deesdae van sy huis af werk, deel sy geheim vir ’n suksesvolle maaltyd: “Sonder om tegnies te klink, is dit ’n goeie balans tussen die teksture en die smaak van die hoofbestanddeel. Dus is eenvoud belangrik.”
Chris glo kook moenie ’n stresvolle gedoente wees nie, maar genotvol. Dis ’n filosofie wat hy daagliks toepas: “Kook met bestanddele van goeie gehalte en maak seker hoe die eindresultaat moet wees. Leer uit jou foute en gryp nuwe uitdagings aan,” sê die gesoute sjef. En maak nie saak in watter gemoedstoestand jy jou kombuis binnestap nie, Chris glo jy moet dit altyd met ’n breë glimlag verlaat.