Hoekom dié reeks anders is en jy dit nie kan mis nie
Tvplus loer agter die skerms van die reeks oor ontrouheid.
Skelmpie Seisoen 1 Saterdae kykNET (*144) 20:00
Jy moet braaf wees as jy besluit om jou vuil wasgoed op TV uit te blaker – soos die slagoffers van egbreuk met wie die aanbieder Rian van Heerden (44) in die nuwe realiteitsreeks Skelmpie (2018-nou) praat. Die program kyk na skelm verhoudings en alles wat daarmee gepaard gaan: van die fisieke daad tot hoe dit uitkring en ander raak. Ons het agter die skerms gaan loer om die feite agter die reeks uit te snuffel – en glo ons, dit kan nie vergelyk word met oorsese reekse oor ontrouheid soos Cheaters (2000nou) en Jerry Springer (1991-nou) nie.
DIE KONSEP
Die reeks was die idee van niemand anders nie as Rian, en dié radio- en TV-persoonlikheid is ook medevervaardiger van die program. “Ek het sowat 'n jaar gelede met kykNET begin gesels oor die konsep en ná vele vergaderings en lekker gesprekke is Skelmpie gebore,” vertel Rian. Hy het saamgespan met die filmmaker en vervaardiger Stefan Neeth
ling (38) van die produksiemaatskappy New Day Films, en in Junie 2017 was alles gereed en kon die opnames begin.
’N NUWE AANSLAG
In Skelmpie gee Rian die betrokke partye die geleentheid om hul kant van die saak te stel. Stefan sê: “Die reeks se doel is nie dat die man of vrou op die egbreker of skelmpie skree en handgemeen raak nie.” Allesbehalwe, want Rian en kie doen juis moeite om die egbreker se identiteit en privaatheid te beskerm deur net hul eerste naam te noem of dit in sommige gevalle anoniem te bespreek.
“Die persoon wat egbreuk gepleeg het, kry ook die kans om in die program te verskyn om hom- of haarself te verdedig,” voeg Stefan by. In gevalle waar hulle nie bereid is om op TV te verskyn nie, word 'n familielid of vriend van die slagoffer betrek, of 'n kenner soos advokaat
Johan Schoeman om oor die spesifieke geval te praat.
DIE HERSTELPAD
Rian sê dis moeilik om nie empatie te hê met die slagoffers van skelm verhoudings nie. “Dis een van die seerste dinge wat met iemand kan gebeur.” Sy doel is om die slagoffers 'n platform te bied waar hulle op die herstelpad kan kom deur hul trauma te deel.
“Ek wil kykers ook leer wat die gevaartekens is as jy vermoed jou wederhelf se oog begin dwaal, maar veral wil ek hulle wys 'n mens kan so iets oorleef. Ons wil hoop bied en kykers laat besef jy kan inderdaad sterker aan die ander kant uitkom,” voeg Rian by.