Sterk Black-ish-vroue
Drie geslagte fabelagtigheid! Is daar enigiets wat die vroue van Black-ish nie kan vermag nie?
Andre “Dre” Johnson sr. (Anthony Anderson) is dalk die pa, die hoof van die huis (hy hoop so) en die verteller wat altyd die laaste woord inkry op Black-ish (2014-nou, seisoene 1 en 2 kan van Showmax afgelaai of gestroom word), maar die waardevolste speler is dr. Rainbow “Bow” Johnson ( Tracee Ellis Ross). Sy is meer as net ’n sitkom-ma.
“Bow is ten volle vrou. Haar moederskap, beroep, vrou-wees – niks hier van is vir haar belangriker as haar self-wees nie. Sy is ’n welvarende vrou, nie ’n gemarginaliseerde vrou nie. Om die nuanse daarvan te hê is verskriklik belangrik,” sê Tracee. Dis die kern van wat Black-ish so ’n heerlik verslawende komedie vir kykers oor die hele spektrum maak: jy hoef nie ’n ma te wees om Bow te verstaan nie, want sy is nie “net ’n ma nie”. Net soos jy nie swart hoef te wees om begrip te hê vir die Johnsons se probleme en vreugdes nie – maar as jy wel swart is, gaan die reeks beslis tot jou spreek.
MA IS HIER
Die reeksskepper Kenya Barris sê: “Ons almal ken die kleurryke karakters, mense wat die reënboog verteenwoordig van wat ons familie is. En dit sorg vir die beste Kersfeeste en die beste familiereünies, want dis nie net een standpunt nie. Die geslagte stem nie noodwendig saam nie, maar hulle word regtig verbind deur die ruggraat van wat ’n familie is.”
En dis presies wat Dre se ma, Ruby (Jenifer Lewis), na die reeks bring – dit sou immers nie ’n gesin-sitkom wees sonder ’n inmengerige skoonma nie. Ruby is’ n kopdoek draende, Satan ha t ende, houtlepel gooi ende dramakoningin. “Wanneer ek Ruby is, verteenwoordig ek die middeljarige swart vrou. Ons is die sout van die aarde. Ons vertel dit soos dit is,” lag Jenifer. En terwyl die konserwatiewe Ruby elke Sondag in die kerk is en “Swart Jesus” om hulp vra, is sy in die week ’n hel op wiele want, soos Ruby erken: “Soms vergeet Grandma sy is gered.” In seisoen 2 episode 19 beskryf Dre en Bow se dogter Zoey ( Yara Shahidi) Ruby as half tiener, half ouerige persoon, en Bow spot Ruby gaan langer as hulle lewe, want “boosheid sterf nooit nie”.
DIE EK-GESLAG
Die laaste van die driedimensionele vroulike karakters is die nuwe geslag, verteenwoordig deur Zoey, wat amper klaar is met afrondingskool. “Sy het haar eie grimeerreeks, is ’n skoonheids-kenner op YouTube, het met twee ouens uitgegaan, kan kar bestuur . . .” sê Yara. “[Die boek] Catcher In The Rye deur J.D. Salinger was die inspirasie vir wie Zoey is. Holden Caulfield [die protagonis] weerspieël die tiener wat haar plek in die immer veranderende wêreld probeer vind. Zoey wil onafhanklik wees en is beslis bekkig. Terselfdertyd is sy steeds afhanklik van haar familie en wil so suksesvol soos haar ouers wees en sy wil nooit grootword nie. Sy gaan steeds deur haar ontwikkelende tienerfase, maar sy is trots en selfversekerd. Selfs al maak sy foute soos alle ander mense sal sy terugbons en kry wat sy wil hê.” En Zoey het ’n tienjarige sussie,
Diane (Marsai Martin), wat wenke kry by al drie vroue terwyl sy grootword.
ONTWERPERVROUE
Fans kan ook uitsien na die sitkomaktrise Raven
Symoné, wat verstommende spel lewer as Dre se suster Rhonda in seisoen 1 episode 22 wanneer sy verduidelik hoekom sy nog nie hul ouers vertel het sy is lesbies nie. Die komediant
Wanda Sykes speel Dre se nuwe baas, Daphne Lido, van seisoen 2 episode 9, en vanaf seisoen 2 episode 11 verskyn die ster Tyra Banks van America’s Next Top Model (2003-nou) as Gigi.