Steffy in die middel
Steffy se nuwe pos as uitvoerende hoof veroorsaak verdere spanning vir die broers Liam en Wyatt.
The Bold & The Beautiful Weekdae SABC3 (*193) 18:30
Steffy Forrester (Jacqueline MacInnes Wood) was vir die grootste deel van 2017 vasgevang in ’n liefdesdriehoek met haar eersdaagse eksman Wyatt (Darin Brooks) en sy broer Liam (Scott Clifton), wat ook Steffy se eksman is. Die spanning bou al sedert middel Januarie vanjaar op, toe Eric (John McCook) en sy vrou Quinn (Rena Sofer) Steffy die hoof- uitvoerende beampte van Forrester Creations gemaak het. Maar daar is ook iets anders wat Eric wil hê op Woensdag 31 Januarie. Hy stel voor Steffy trek by “my, Wyatt en Quinn” in. En dis wanneer dit Steffy tref “haar aanstelling as hoof was ’n manier vir Eric en Quinn om haar en Wyatt nader aan mekaar te bring en haar uit Liam se arms te kry”, sê Jacqueline. En Steffy is nie die enigste ontevrede een nie . . .
GEEN VERRASSING
Liam is nie verras wanneer Steffy hom vertel wat sy gevra is nie. “Liam besef haar aanstelling se doel is om ’n wig tussen hulle in te dryf en Steffy terug te kry by Wyatt,” sê die uitvoerende vervaardiger en hoofskrywer, Bradley Bell. Al stel Steffy Liam gerus met “dis net tot die egskeiding afgehandel is”, dink Liam die skrif is aan die muur. Hy verloor op Vrydag 2 Februarie sy humeur by ’n Forrester- direksievergadering wanneer die “skakelbeampte-superster” Wyatt Steffy se sosialemediaveldtog “S” onthul, tesame met die sexy foto’s wat Wyatt van sy vrou geneem het. “Dis vernederend vir die hoof en die maatskappy en ek hou nie daarvan nie,” skree Liam vir Wyatt, wat die uitbarsting ignoreer.
GEEN HOOP
Liam soek steun by Ridge (Thorsten Kaye) op Maandag 5 Februarie, en sê vir hom: “Ek kan voel hoe sy in Wyatt se arms glip.” En by Forrester se kantore smeek Wyatt Steffy om terug te kom na hom toe. “Daar is niks wat ek en jy nie kan bereik nie. Met die familie aan ons kant kan ons nie misluk nie.” Wie gaan Steffy kies: neulende Liam of smekende Wyatt?