My Sakpastroue
Troukoors het VIA se Februarie-skedule oorgeneem met die vyfde seisoen van die realiteitreeks My Sakpastroue (2015nou) wat vandag begin. “Dis die een dag wat almal glo in liefde vir ewig en altyd,” verduidelik Amor Engelbrecht, uitvoerende vervaardiger van die reeks, hoekom soveel kykers gefassineerd is met troureekse. Amor vertel ons meer van die nuwe seisoen en wat sy tot dusver alles oor troues en begrotings geleer het.
Hoeveel inskrywings het julle vir die nuwe seisoen gekry? In die laaste paar maande het ons sowat 60 inskrywings gekry wat ons moes beperk tot 13 paartjies vir ons 13 episodes die seisoen. Waarom is My Sakpastroue so gewild? Ons glo dis omdat ons reeks kykers inspireer om groter te droom en te besef hulle sprokiesdag is moontlik, al is hul begroting knap. Elke paartjie wat deelneem, bewys dit en gee kykers blink idees oor hoe hulle hul spesiale dag ’n werklikheid kan laat word, van kostebesparings tot idees vir versierings. Hoeveel verskil die paartjies se begrotings
vir hul troues? Elke troue se begroting is besonders. Vir sommige is die rok ononderhandelbaar en vir ander is die kos en musiek belangrik. Die duurste troue tot dusver was Sunette en Stiaan Ras s’n in seisoen 4 (2017). Hul begroting was R300 000 waarvan hulle R283 000 spandeer het. En die goedkoopste troue was die van Melissa en Gustav Luies in seisoen 3 (2016). Hul begroting was net R7 250 en hulle het nog R300 oorgehou! Watter interessante kostebesparingswenk het jy by die reeks geleer? Wanneer jy kwotasies vra, moenie aan die diensverskaffer sê dis vir ’n troue nie. Sommige plekke vra meer geld vir troues.