Koebaai vir nou
Sasha en Silvia groet die Stryders en kie.
Dis nooit maklik om tot siens te sê vir ’n sepiekarakter nie, wat nog gepraat van twee op een slag! Dis ongelukkig wat gebeur in Getroud Met Rugby (2016-nou) op Vrydag 6 April wanneer ons afskeid neem van die sangeres Sasha en hoofpompondanseres Silvia (Anlia van Rensburg en Nastassja Pretorius). Albei karakters trek Kaap toe – Sasha vir haar sangloopbaan en Silvia gaan fotografie studeer.
WEGBREEKKANS
Sasha het einde Februarie ’n erge liefdesteleurstelling beleef toe sy en haar kêrel, die Strydersrugbyspeler Reitz (Sean van Noordwyk), uitgemaak het. Silvia het ook deur ’n rowwe tyd gegaan toe sy middel Maart haar seksualiteit bevraagteken en op haar vriendin
Lynette (Diani Gernandt) verlief geraak het.
Die skuif kom vir albei op die perfekte tyd. “Vir Sasha is dit ’n wegbreekkans van alles wat haar aan Reitz herinner,” sê Anlia en Nastassja voeg by Silvia gaan na “’n nuwe avontuur”.
Op Vrydag 6 April word ’n afskeidspartytjie vir hulle in die Potties-kroeg gehou en dis ’n bittersoet affêre. “Silvia groet haar pompons en gee die ‘kroon’ van hoofpompon oor aan
Mia (Louise van Greunen),” vertel Nastassja. Sasha en Reitz groet mekaar finaal met ’n snikkende snesie-toneel wat “Sasha se hart breek, maar sy besef dis die regte ding om te doen sodat hulle albei as individue kan groei”, sê Anlia.
VAN SANG TOT JOGA
Anlia sowel as Nastassja het al in November verlede jaar hul laaste dag op die Getroud-stel deurgebring, en sedertdien het hulle nie stilgesit nie.
Anlia het met sangoptredes by verskeie feeste, skole en funksies landwyd opgetree. Nastassja het jogaklasse begin gee en speel in April in ’n kinderteaterstuk, In Die Land Van Kammalielie, by die Atterbury-teater in Pretoria.
Anlia het besluit om nie haar kontrak te hernu nie sodat sy op haar sangloopbaan kan fokus en haarself vir ander akteurswerk beskikbaar stel. “Die tyd was reg om te gaan,” sê Anlia en voeg by sy wil graag in flieks en ander reekse speel – daar’s klaar ’n paar in die vooruitsig waaroor sy nie meer wil uitlap nie.
Nastassja se storielyn het tot ’n einde gekom. “Ek het dit sien kom en is nie juis hartseer daaroor nie. Een ding moet eindig sodat ’n nuwe kan begin,” sê sy.