Santa Diabla
Seisoen 1 e.tv (*194) 09:30 Telenovelle Gaby Espino skerts sy was moeg daarvoor om van loopbaan te verwissel, “dus het ek gekies om eerder ’n aktrise te word”. Sy speel die wraakgierige Santa Martínez in die Latyns-Amerikaanse telenovelle Santa Diabla (2013-2014), en voeg by “daar’s niks beters as om ’n TVskurk te speel nie, selfs al is jy iemand goed wat iets slegs doen”. Maar die 40-jarige is allesbehalwe wreed in die regte lewe – sy was as kind omring deur diere en wou ’n veearts word.
“Om te swot was moeilik – ek het nooit by veeartsenykunde uitgekom nie,” bieg Gaby. Sy het twee keer van studierigting verander, van tandarts-assistent na skakelkunde, “maar die boeke was nie vir my bedoel nie”. Gaby se eerste rol was ’n drie-ineen-pakket vir die kinderprogram Nubeluz (1990-1996). Sy was twee jaar lank die aanbieder, het die musiekster genaamd Dalina gespeel en ook haar eie liedjies in die program gesing. Gaby is nie net die gesig vir Pepsikoeldrank in Venezuela nie, maar het ook haar eie reeks skoonheidsprodukte en deel haar velsorgwenke aanlyn. Haar reël nr. 1: Moet nooit met grimering aan gaan slaap nie, maak nie saak hoe laat jy tuis gekom het nie. Sy word as ’n sepie-superster in haar geboorteland Venezuela beskou, en kry glo feitlik elke nuwe telenovelle-draaiboek om te lees en te oorweeg voor enige ander aktrise. Ten spyte van haar besige lewe – sy lewer motiveringspraatjies en is betrokke by verskeie fliek- en TV-projekte – sê Gaby “niks is so belangrik soos jou kinders en familie nie”. Sy het ’n elfjarige dogter, Oriana, en ’n vyfjarige seun, Nickolas, by haar akteur-eksman Cristobal Lander en ekskêrel Jencarlos Canela onderskeidelik.