Liefde in die Laan
André en Connie word uiteindelik ’n paartjie, maar is dit van korte duur?
Weekdae SABC2 (*192) 18:00
Laanliefhebbers was einde Maart in hul skik toe die sjef Vince (Jacques Blignaut) en Aggie (Mimi Mahlasela), ’n geleentheidsbeplanner by Bruynwaves, weer hul liefdespad na mekaar gevind en ’n paartjie geword het. En dit was nie die einde van nuwe Laanliefde nie. André (Marcus Muller) vra Connie (Quinne Brown Huffman) uiteindelik op Vrydag 13 April om die vrou in sy lewe te wees, al was hul verhouding die afgelope tyd wankelrig. Maar as dinge eers moeilik begin, is daar dikwels ’n moeilike einde . . .
SPOOK UIT DIE VERLEDE
Quinne sê Connie is weer reg vir liefde. “Maar dinge uit haar verlede pla nog,” sê sy met verwysing na Connie se stormagtige verhouding met haar eksman, Matt (David Dukas), wat in Desember verlede jaar tot ’n einde gekom het. “Matt het haar fisiek en emosioneel mishandel, en hoewel Connie weet André sal nooit so optree nie, sukkel sy om enige man ten volle te vertrou,” verduidelik Quinne.
Connie besluit op Donderdag 12 April sy gaan haar vrees oorkom en konfronteer André oor waar hulle met mekaar staan en of hulle ’n ernstige verhouding gaan begin of nie.
AMPTELIKE PAARTJIE
Die volgende dag, op Vrydag 13 April, is dit Aggie – Connie se bestie en woonstelmaat – wat eerste die nuus kry: Connie en André is amptelik ’n paartjie. “Connie is dolverlief en gelukkig,” sê Quinne. “Sy sien daarna uit om ’n toekoms saam met André te bou.”
Maar min weet sy daar gaan op Woensdag 18 April ’n donker kant van André na vore kom wanneer hy emosioneel te betrokke raak by ’n nuwe kliënt se saak. “Connie kom agter daar is iets groots wat André pla, maar hy wil nie openhartig daaroor praat nie,” sê Quinne.