Wraakspel
Kwaito en Tbose beland in die moeilikheid omdat hulle die dosent mnr. Spiller aanval.
Skeem Saam Weekdae SABC1 (*191) 18:30
Tbose (Cornet Mamabolo) wil hê sy varsitykamermaat, Kwaito (Clement Maosa), moet sy dosent
mnr. Spiller (Jürgen Hellberg) gaan aangee omdat hy Kwaito se ingenieursprojek in Maart gesteel het, maar Kwaito het ander planne op Woensdag 11 April. Hy kry ’n toegangskaart by sy oneerlike IT-pel Fanie (Gift Mokampanyane) vir die gholfbaan waar die dosent speel. Maar op Vrydag 13 April “kry Tbose nie ’n goeie gevoel wanneer hulle oor die gholfbaan na die dosent toe sluip nie”, sê Cornet. “Hy probeer Kwaito keer, maar dit help nie.” Met gholfstokke byderhand en ’n vurige student wat voel hy is bedrieg, is mnr. Spiller nie veilig nie.
SING ’N ANDER DEUNTJIE
Kwaito en die dosent het ’n konfrontasie op Maandag 16 April, maar dis nie duidelik wie reg en wie verkeerd is nie, erken Cornet. Spiller meen hy het die prototipe op Maandag 19 Maart gekoop en vir Kwaito die geld gegee wat hy gebruik het om sy suster
Pretty (Lerato Marabe) se universiteitskuld te betaal. “Kwaito ontken dit,” sê Cornet, “en mnr. Spiller verander sy storie. Hy beweer die geld was eintlik ’n voorskot op die salaris wat Kwaito by sy ingenieursfirma sou verdien nadat hy graad gevang het.” Kwaito eis sy prototipe terug, maar mnr. Spiller het skaars gesê hy moet loop, of “die dosent lê bewusteloos op die grond en bloei. Kwaito en Tbose dink mnr. Spiller is dood en vlug,” vertel Cornet.
ARRESTASIE
Omdat hulle besef hulle het te ver gegaan, gee die studente hulle op Vrydag 20 April oor en is steeds onbewus van Spiller se toestand, maar dis nie hul grootste bekommernis nie. Hulle is in 2014 gearresteer vir die tref- en-trapongeluk wat Ben Kunutu (die rol is nie gevul nie) se dood veroorsaak het. “Kwaito wil die gevolge alleen dra, maar Tbose weier om sy vriend te verlaat,” sê Cornet. Tbose se prokureurbroer Leeto (Eric Macheru) reël vir hulle borgtog op Maandag 23 April, maar net omdat daar geen bewyse is nie. “Hulle is nog nie vry nie,” waarsku Cornet. “Niemand kan Spiller se liggaam opspoor nie.” Voorlopig . . .