Waar is my tiara?
Once Upon A Time is meer as net feëverhale wat werklikheid word – dit wemel ook van Disney-koninklikes!
TV is die plek waar drome en feëverhale waar word, en danksy die internetstroomdiens Showmax kan kykers betower word deur die fantasiereeks Once Upon A Time (2011-nou; seisoene 1-5 is beskikbaar om af te laai vir jou ure lange kykgenot). “In die program is dit asof elke sprokieskarakter wat jy van kleins af ken en liefhet werklik is, en hulle woon in die dorp genaamd Storybrooke,” vertel Jennifer
Morrison, wat die borgtogagent Emma Swan speel. “Die karakters is vervloek en daarom weet hulle nie wie hulle is nie.” Tussen die “gereelde” sprokieskarakters sal jy ook prinsesse opmerk wat deur die vermaakreus Disney beroemd gemaak is, soos . . .
ARIEL Uit die 1989-animasiefliek The Little Mermaid
’n Meermin in ’n woud? Niks is onmoontlik in Once Upon A Time nie, en Ariel (JoAnna Garcia) red Sneeuwitjie (Ginnifer Goodwin) van verdrinking ná sy in seisoen 3 episode 6 van ’n krans afgespring het. Ariel is op soek na ’n man ge- naamd Eric (Gil McKinney), op wie sy verlief is sedert sy hom ’n jaar gelede gered het. En omdat Sneeuwitjie heelwat weet van liefde met die eerste oogopslag, wil sy Ariel help om haar “ware liefde” te vind tydens die 12 uur per jaar wanneer meerminne op grond kan loop.
RAPUNZEL Uit die 2010-animasie fliek Tangled (sien bl. 40)
Soos in die oorspronklike feëverhaal is Rapunzel (Alexandra Metz) in ’n toring opgesluit in Once Upon A Time seisoen 3 episode 14. Sy kruip weg oor haar lot as die toekomstige koningin, en dan sien sy Prince Charming (Josh Dallas) onder staan. Maar hy’s nie alleen nie – ’n donker gees volg hom wanneer hy teen Rapunzel se lang vlegsel na haar toe opklim . . .
BELLE Uit die 1991-animasiefliek Beauty And The Beast
Die oulike, onskuldige Belle (Emilie de Ravin) is niks meer as ’n slaaf in seisoen 1 episode 12 nie. Sy is gedwing om in diens te staan van die sprokie-bedrieër Rumple
stiltskin (Robert Carlyle) in ruil daarvoor dat hy haar dorp beskerm. Maar Belle raak verlief op haar gevangenemer, en net wanneer Belle en Rumple voel alles in hul vreemde liefde val in plek, steek die Bose
Koningin (Lana Parrilla) haar neus in hul sake en dryf die skoonheid en haar monster uitmekaar.
ELSA Uit die 2013-fliek Frozen
Elsa (Georgina Haig), die prinses met mag oor sneeu en ys, duik in seisoen 3 episode 22 op en soek leidrade oor haar ouers, die koning en koningin. Sy beland in ’n kruik wat in Rumplestiltskin se kelder toegesluit is, maar verwag ’n sneeustorm en ysige koue in Storybrooke wanneer Elsa in seisoen 4 bevry word.
MERIDA Uit die 2012-fliek Brave
Die rooikop-boogskieter Merida (Amy Manson) daag in seisoen 5 episode 1 op om Storybrooke se redder Emma, wat deur duisternis verswelg word, te red. Die enigste hoop vir Emma is om die towenaar Merlin (Elliot Knight) in Camelot te vind, met Merida wat Emma op haar soektog beskerm.