’n Aggressiewe kant
’n Nuwe hofsaak laat André se geraamtes uit die kas tuimel.
7de Laan Weekdae SABC2 (*192) 18:00
Die aantreklike Hillside-prokureur André (Marcus Muller) se eenvoudige lewe en verhouding met die boetiekbestuurder Connie (Quinne Brown Huffman) word bedreig.
Die geraamtes in sy kas begin kriewel wanneer hy op Woensdag 25 April emosioneel betrokke raak by ’n kliënt se saak. “Die storielyn gaan kykers laat wonder oor André, maar soos die gebeure ontvou sal mense verstaan waarom hy so optree,” vertel Marcus geheimsinnig.
DOMINEE SE VAL
André het middel April betrokke geraak by die hofsaak oor dominee Burger (Arnold van Heerden), wat op Maandag 9 April na die Hillside-kliniek gebring is nadat hy van die balkon van sy woonstel geval het.
“Dominee Burger se kerkraad het na ’n regskliniek gegaan en hulp gevra, omdat die dominee se val verdag gelyk het. Die regskliniek het André toe genader om die staatsaanklaer met die saak te help, sodat hulle kan seker maak niks word misgekyk nie,” vertel Marcus.
Soos André meer inligting bekom het, veral oor die dominee se seun, Jacques (Ruan Wessels), wat sy pa blykbaar van die balkon afgestamp het, het hy begin besef daar is meer aan die saak as wat hulle aanvanklik gedink het, voeg Marcus by.
ONDERDRUKTE PYN
Ná sy eie speurwerk kom André op Woensdag 25 April op inligting af wat daarop dui Jacques het dalk geregverdige redes gehad om so teenoor sy pa op te tree. Die dominee is nou verlam en is breindood verklaar.
“André het geen konkrete bewyse nie, maar sy vermoede van mishandeling is sterk,” sê Marcus. “En dit ontstel André, want dit diep herinneringe op van sy eie kinderjare en sy moeilike verhouding met sy pa. André onderdruk dit al jare lank.”
Omdat André besef hy raak emosioneel by die saak betrokke, nader hy later op Woensdag 25 April een van sy prokureursvriende om die saak by hom oor te neem.
TERUGFLITSE EN WOEDE
Die volgende dag, op Donderdag 26 April, gaan dit nie goed met André nie. Hy sukkel om die Burger-saak te laat vaar.
“Hy kry gedurig terugflitse van insidente tussen hom en sy pa, en boonop tree hy kwaadwillig teenoor Connie op,” sê Marcus.
Dit ontstel Connie, wat self jare lank aangerand en mishandel is deur haar eksman, Matt (David Dukas). André weet van alles wat Matt aan Connie gedoen het, en omdat hy nie dieselfde aan haar wil doen nie, begin hy haar vanaf Vrydag 27 April wegstoot. En dis maar goed so, want op Maandag 30 April het hy ’n visioen waar Connie in gevaar is en dis alles sy skuld,” vertel Marcus.
DRAMA IN DIE HOF
Intussen begin Jacques se hofsaak op Woensdag 2 Mei en die spanning loop hoog. Jacques se ma, mev.
Burger (Franci Swanepoel), getuig in die hof en die dinge wat sy kwytraak maak Jacques so kwaad, hy bars aggressief in die hof uit.
Sy reaksie doen sy saak natuurlik geen guns nie – dis duidelik wanneer die hofverrigtinge op Vrydag 4 Mei hervat word.
Elders gaan dit nie beter met André nie. “Hy verwyt homself omdat hy sy donker kant gewys het. En dit juis aan Connie, vir wie hy soveel omgee,” vertel Marcus.