Liefde in die lug
Karli is agter Arno aan, maar hy hou meer van Pippa.
Die verpleegster Karli (Pascal Pienaar) gooi haar flikkers die afgelope week kliphard vir die polisieman Arno (Stiaan Smith). Maar wanneer Pippa (Nadia Valvekens), wat sedert Maandag 16 April vir Arno noodhulpklasse gee, besef Arno maak eintlik vir haar (Pippa) ogies, moedig sy hom aan om eerder aandag aan Karli te gee.
“Pippa voel sy is nog nie gereed vir ’n verhouding nie, en haar prioriteite is haar kind en haar loopbaan,” vertel Nadia. Maar die polisieman gooi nie so gou tou op nie.
“Arno voel seergemaak omdat Pippa hom so gemaklik eenkant toe stoot wanneer hy haar aanhoudend uitvra. Tog hou hy van die nuwe uitdaging en begin stadig maar seker besef hy wil graag vir Pippa baklei,” vertel Stiaan.
BEDRYWIGE ENKELMA
Die groot vraag is: gaan Pippa, wat ’n lang geskiedenis van mislukte liefdesverhoudings het, haar hart weer oopstel vir ’n nuwe liefde? Behalwe dat Pippa ’n bedrywige enkelma is en nie baie tyd het vir ’n vaste verhouding nie, het sy aanvanklik nie veel ooghare vir Arno nie. “Arno is arrogant. Pippa het voorheen voor dieselfde soort ouens met ’n groot ego geswig, en nou is sy skrikkerig om in dieselfde slaggat te trap,” vertel Nadia.
Op Donderdag 26 April begin Pippa Arno se uitnodiging heroorweeg, want sy was jaloers toe Arno die vorige aand vir Karli uitgeneem het. “Watter vrou hou nie van aandag nie? Dis mos maar ’n ego-ding. Boonop moedig haar vriendin Bronwyn (Kim Cloete) Pippa heeltyd aan om met haar lewe voort te gaan,” sê Nadia. Sy SMS vir Arno dieselfde dag: “Oukei. Ek was ’n bietjie jaloers. Een date sal lekker wees. P.”
Arno is in die wolke: “Hy’s opgewonde omdat hy nou die geleentheid het om homself aan Pippa te bewys. Toegegee, Arno kom baie selfversekerd oor, maar dit is nie altyd die geval nie,” voeg Stiaan by.
EERSTE AFSPRAAK
Arno en Pippa voel tydens hul eerste afspraak op Vrydag 27 April soos tieners. “Hoe langer hulle gesels, hoe meer ontspan Pippa,” vertel Stiaan. Nadia stem saam: “Hulle albei voel aan die einde van die aand die tyd het gevlieg.”
Die volgende dag glinster Pippa se oë. “Pippa vertel vir Bronwyn sy kyk met nuwe oë na Arno, en Bronwyn is saam met haar verheug omdat die afspraak so goed verloop het.”
En nou begin die liefde in alle erns blom. Op Maandag 30 April verras Arno Pippa by haar woonstel met aandete, en op Woensdag 2 Mei vang Arno haar onkant met ’n eerste soen. “Pippa voel vir die eerste keer in ’n lang tyd verlief. Arno laat haar werklik spesiaal voel,” sê Nadia.
Arno vra die volgende dag (3 Mei) hoflik om verskoning omdat hy Pippa onkant gevang het met die gesteelde soen. “Maar hy vra nie om verskoning vir die soen nie,” sê Nadia met ’n glimlag.
JALOERS
Hoewel die Binnelanders almal opgewonde is oor Pippa se nuwe liefde, is Pippa se eksverloofde dr. Conrad Bester (Hykie Berg) groen van jaloesie. “Hy waarsku Pippa dat sy nie ‘gevaarlike’ mense soos ’n polisieman in haar lewe moet toelaat nie,” vertel Nadia. “Ek dink Conrad is buite perke, en hy gun haar nie geluk en nuwe liefde nie. Eintlik is dit niks anders as suur druiwe nie, want Conrad het meer as een keer ’n kans gehad om Pippa se liefde te wen. Pippa beskou Conrad as die verlede, hoewel daar seker altyd ’n sterk band tussen hulle sal wees.”
Is Arno dan uiteindelik die een vir Pippa? Nadia antwoord eerlik: “Dis nog te vroeg om ’n afleiding te maak, maar die tyd sal leer. Daar is weliswaar ’n sterk aantrekkingskrag tussen hulle.”
Stiaan is positief. “Arno voel elke dag meer ernstig oor die blondekop. En hy oorweeg vir die eerste keer in ’n lang tyd ’n hegte verhouding.”
2005: Dr. At Koster (Hans Strydom) se swartskaapseun Malan (Paul du Toit) en Pippa was verlief, maar nadat Malan Pippa met die paramedikus Roxy (Tanya van Graan) verkul het, het Pippa die verhouding verbreek. Malan is in 2014 uit Binnelanders weg, maar het in 2015 teruggekeer. Hy sterf dieselfde jaar in ’n motorongeluk. 2009: Die plastiese chirurg dr. Nathan Richards (Karl Thanning) en Pippa se verhouding was van korte duur nadat sy uitgevind het sy het endometriose wat ’n vrou onvrugbaar kan maak. Sy het geweet Nathan wou ’n string kinders hê en wou hom nie dié voorreg ontneem nie.
2011-2012: At se ander seun
dr. Conrad Bester (Hykie Berg) en Pippa sou in 2012 trou, maar Conrad het die dag voor die troue vir Pippa vertel hy het haar verkul met haar beste vriendin
Stefanie (Rolanda Marais). Pippa het Conrad voor die kansel gelos. Nadat Pippa en Alex (Ashley Dowds) se verhouding verlede jaar verby is, het Conrad weer ’n rukkie by haar gekuier. Hy was op die punt om Pippa weer te vra om te trou maar het besef sy het nog nie haar oorlede man, Rian (Erik Holm), se dood verwerk nie. 2008: Die ginekoloog dr. Andreas
Geldenhuys (Heinz Winckler) en Pippa het ’n passievolle maar ’n kortstondige verhouding gehad voordat hy groener weivelde gaan soek het.
2013: Die sportiewe dr. Gustav Kemp (Stefan Ludik) wou bitter graag hê Pippa moet aan sport deelneem soos hy. Hul verhouding was uiteindelik op die rotse omdat sy leefstyl te roekeloos was na Pippa se sin. 2014: Die biljoenêr Rian
Malherbe (Erik Holm) was voorheen met Stefanie (Rolanda Marais) getroud, en hy en Pippa het in 2014 afgehaak. Hulle was baie gelukkig, maar Rian het in 2016 tragies in ’n vliegongeluk gesterf nadat sy korrupsie op die lappe gekom het. 2017: Die enkelpa Alex (Ashley Dowds) en Pippa het by ’n organisasie vir enkelouers ontmoet. Maar Alex en sy eksvrou, Nicci (Samantha Peo), het om praktiese redes steeds saam gebly. Pippa kon dit nie langer verduur dat Alex en Nicci se paadjies nie finaal skei nie en het Alex gelos.