3de keer gelukkig?
Steffy en Liam se Australiese troue het meer as net ’n gelukkige einde: daar’s drama, ’n val in die see en liefdesvetes!
Bold se dramakoningin Steffy Forrester en haar verloofde Liam Spencer (Jacqueline MacInnes Wood en Scott Clifton) trou op Woensdag 25 April in Sydney, Australië, van alle plekke. Hulle is op die punt om “ja” te sê voor ’n klein groepie uitgesoekte familie en vriende . . . onder andere die rooikop
Sally Spectra (Courtney Hope), hul “ongenooide” gas wat daar is as Thomas
Forrester (Pierson Fodé) se metgesel by die troue. “Natuurlik is Steffy nie beïndruk met Sally se teenwoordigheid nie, maar sy gaan nie toelaat dat ’n Spectra haar gelukkige dag bederf nie,” sê Jacqueline. Dit beteken nie die dag se drama is verby nie, inteendeel, die Forresters het pas begin!
GEK STEFFY
Die bruid stap nie na die kansel toe nie – Steffy kom met ’n foefieslaaid aangegly, wat Quinn (Rena Sofer) sprakeloos laat. “Moet ek haar net Tinker Bell noem?” vra sy vir manlief
Eric (John McCook), “want die aankoms was gek!” Jacqueline verduidelik: “Steffy wou [vir haar aankoms] iets doen wat nog nie voorheen gedoen is nie – iets onvergeetliks en cool.” Steffy en Liam het net oë vir mekaar tot hulle as man en vrou verklaar word op Woensdag 25 April, en hulle verseël hul liefde met ’n soen. En met almal om hulle wat hulle toejuig, boender Liam die gaste in die snelbote wat op Donderdag 26 April wag, gereed om hulle na ’n strandonthaal te neem by die beroemde Shelly Beach. Maar omdat dit Bold is, “begin die aksie regtig by die onthaal”, terg Bold se uitvoerende vervaardiger, Bradley Bell. “En dit verander vinnig in hewige konflik en hartseer. En iemand gaan in die water beland!”
VERTOONKONINGIN
Terwyl Steffy Thomas die kop was omdat hy “die vrou” saamgebring het, gryp Sally haar foon en stap weg om enige drama te vermy. Sy bel haar tant Shirley (Patrika Darbo) in LA en vertel haar die jongste “nuus” van wat in Australië gebeur. Steffy sien Sally raak, storm op haar af op Vrydag 27 April, en beskuldig Sally daarvan dat sy steelfoto’s van haar trourok geneem het. “Steffy weet wanneer Sally in die omgewing is gaan daar altyd iets sinisters aan,” sê Jacqueline – en sy’s nie verkeerd nie. Steffy skree vir Sally: “Jy probeer net munt slaan uit my sukses, soos jy altyd doen. Maar die keer gaan dit nie gebeur nie.” Voordat Sally iets kan sê, gryp Steffy haar en Sally beland in die see [lees verder vir meer oor hoe Bold die toneel verfilm het]. “Dis nie snaaks nie!” skree Sally vir Steffy en Thomas, wat aangehardloop kom wanneer hy die katgeveg sien. Thomas sien die ligter kant van dinge en probeer ’n woedende Sally uit die water vis voordat sy na die hotel toe storm om haarself af te droog en tot bedaring te kom. “Dit was ’n goeie maagval, of moet ek sê duikslag . . .’’ vertel Thomas grappenderwys vir Steffy.
UIT EN GEDAAN
Met dit alles wat aangaan, het niemand by die onthaal agtergekom Quinn vertrek nie. Niemand behalwe haar skoonseun en geheime minnaar Ridge (Thorsten Kaye) nie, wat Quinn na die strand volg. Daar gesels hulle oor hul gevoelens en situasie, wat op ’n einde is, want Ridge maak gereed
om met Brooke (Katherine Kelly Lang) te trou. Ridge neem Quinn se hand en sê eerlik vir haar: “Daar was ’n konneksie tussen ons. ’n Vonk. Dit was baie vreemd en baie spesiaal. En dis 100 persent verby.” ’n Glimlaggende Quinn sê “dankie” en hulle soen vir oulaas. Oeps – hulle weet nie Brooke het ook langs die see gaan stap nie en sy kyk om ’n hoekie op Maandag 30 April na hoe haar verloofde sy skoonma soen. “Brooke raak ontsteld en woedend,” sê Katherine. “Sy besef haar aanstaande man, haar sielsgenoot, het heeltyd vir haar gejok. Nou is dit oorlog,” waarsku Katherine.
LEWENDE SIEKTE
Later die dag probeer Quinn dinge met Brooke uitstryk, en sê vir Brooke “dis nie soos dit gelyk het nie!” Maar Brooke luister nie en kap terug: “Jy’s siek. Jy’s boos. Jy is soos ’n siekte wat een vir een oor ons kom. Tot hiertoe en nie verder nie! Jou tyd is verby.” ’n Skaapagtige Ridge probeer Brooke kalmeer, maar sy sis dit is tyd om Eric te vertel – en dit beteken moeilikheid! Die ontroue paar smeek Brooke om hul geheim te bewaar, maar dit lyk of Brooke klaar besluit het, sê Katherine. “Sy het regtig gedink hierdie keer sou dinge anders wees met Ridge. Hulle was veronderstel om gou ná Steffy en Liam te trou en nou gaan dit nie gebeur nie. Sy is verpletter en seergemaak, dus kan ’n mens jou indink sy sal enigiets in haar vermoë doen om die twee terug te kry. Dis ’n dubbele ramp!” Ridge en Quinn volg Brooke terug na haar hotelkamer en oorreed haar om hulle nie te ontmasker nie. Sy stem in om stil te bly in die lig van wat dit aan Eric se reeds swak hart kan doen ná sy mediese probleme in 2017, maar Brooke se sus Katie (Heather Tom) is ’n ander storie. Sy sou alles kon onthul om haar voet in die deur by Eric te kry as Quinn uit die pad is. Een ding is seker: Brooke en Ridge gaan nie in die afsienbare toekoms trou nie.
NAT & WILD
Fans moet op Vrydag 27 April kyk wanneer Sally op haar maag in die see beland. Jy sal dalk ’n ligte verandering in die haarkleur merk wanneer Sally die water tref. Dis haar karakter Courtney se waaghalsdubbelganger Jackie Murray. Die 39-jarige sê: “Dit was pret en ek het nie omgegee vir die water nie, want dit was regtig warm.”